Самарқанд “Челленжер”. Теннисчиларимизнинг барида мағлубият

Соврин жамғармаси 75 000 АҚШ долларини ташкил қилувчи мусобақанинг қолган қисми энди ҳамюртимизсиз ўтади. Биринчи давранинг ўзида барча теннисчиларимиз мағлубият аламини тотиб кўришди. Дунё рейтингида 96-ўринга тушиб кетган Денис Истомин 289-поғонадан жой олиб турган аргентиналик Педро Качинга 6:7(3), 4:6 ҳисобида имкониятни бой берганди. 

Жўрабек Каримов рейтингда ўзидан деярли 300 поғона юқоридаги Харрис Жорж Ллойдга 3:6, 3:6 ҳисобида ютқазди. Рейтинги бўлмаган Фаррух Дўстов ATP рейтингида 240-ўринни эгаллаб турган Хитой Тайпейи вакили Ян Цун-Хуага 1:6, 3:6 ҳисобида мағлуб бўлди. 

Иккинчи ракеткамиз Санжар Файзиев босниялик тажрибали ракетка устаси Алдин Шеткичга 3 соату 2 дақиқа давом этган учрашув якунида 6:7(4), 7:6(1), 3:6 ҳисобида енгилди. Сергей Фомин эса турнирнинг учинчи ракеткаси сербиялик Никола Милоевичга қаршилик кўрсатмади - 0:6, 0:6.