Самбо. Жаҳон чемпионати қаҳрамонларига қанчадан пул мукофоти тақдим этилди?

Тошкент халқаро аэропортидаги тантанали кутиб олишдан сўнг самбочиларимиз махсус тадбирда иштирок этишди. Унда шунингдек Ўзбекистон Туризм ва спорт вазири ўринбосари Аваз Каримов, Миллий олимпия қўмитаси бош котиби Ойбек Касимов, Осиё самбо уюшмаси президенти Аламжон Муллаев, Ўзбекистон самбо ассоциацияси раиси Алишер Алимов, спортчи ва мураббийлар, спортчиларнинг яқинлари ва ОАВ ходимлари қатнашишди.

Тадбир давомида сўзга чиққанлар самбо спорти Ўзбекистонда янада ривожланаётгани, кўрсатилаётган эътибор ўз самарасини бера бошлаганини таъкидлашди. Самбо Осиё ўйинларида Ўзбекистон делегациясига медаль тақдим этувчи асосий спорт турларидан бири эканлиги таъкидланди. Яқин келажакда самбо Олимпия ўйинлари дастурига ҳам киритилишига тилакдош эканликларини қайд этишди.

Шундан сўнг, ЖЧ қаҳрамонларига пул мукофотлари топширилди. Унга кўра, олтин медаль соҳибларига 10 миллион сўм, кумуш ва бронза медаль соҳибларига мос равишда 5 миллион ва 3 миллион сўмдан пул мукофотлари сертификати тақдим этилди.