Санжар Ташкенбай Иноуэ билан жанг қилишни истайди

28 август куни Астона шаҳрида Халқаро бокс кунига бағишланган IBA Nomad турнири бўлиб ўтади. Унда Ташкенбай филиппинлик Нил Хакамосга қарши жанг қилади. Жанг ғолиби биринчи энг енгил вазнда IBF Asia чемпиони унвонини қўлга киритади.

"Мен учун биринчи жангимнинг ўзида чемпионлик камари учун курашиш катта имконият. Бу имконият берилганидан жуда хурсандман. Рақибим кучсиз боксчи эмас. Унинг зарбалари жуда кучли ва профессионал боксда тажрибаси ҳам бор.

Аллоҳ насиб қилса, жангни фаол олиб боришга, охиригача курашишга ва рингни рақибга бериб қўймасликка ҳаракат қиламан. Рақибимнинг кучли экани мен учун ҳатто яхши. Ўйлайманки, иккимиз мухлисларга қизиқарли ва томошабоп жанг тақдим этамиз.

Ҳозир яхши спорт формасидаман ва бўлажак жангга тўлиқ тайёрман. Профессионал боксда ўзимни синаб кўришни хоҳлагандим. Кейинги режалар ҳақида ҳозирча аниқ гап йўқ.

Асосий мақсадим — ўз вазнимнинг қиролига айланиш. Шунингдек, куни келиб Наоя Иноуэ билан бир рингда жанг қилишни истайман. У менга энг ёқадиган боксчилардан бири", — деди Ташкенбай.