Шаҳрам Ғиёсов: “Энг катта орзуим рўёбга чиқди”

Биринчи Президентимиз Ислом Каримовнинг фармонларига мувофиқ Ўзбекистон Республикаси мустақиллигининг 25 йиллиги арафасида мамлакатимизни ҳар томонлама ривожлантириш, юртимиз тинчлиги ва осойишталигини мустаҳкамлашга катта ҳисса қўшган, ижтимоий-иқтисодий ва маънавий-маърифий соҳаларда фидойилик кўрсатган бир гуруҳ ватандошларимиз давлат мукофотлари – фахрий унвонлар, орден ва медаллар билан тақдирланган эди.

Бош қомусимиз ҳисобланган – Ўзбекистон Республикаси Конституцияси қабул қилинган кунга бағишлаб ўтказилган маросимда ана шу юксак мукофотлар ўз эгаларига топширилди.

Тақдирланганлар орасида Рио Олимпиадасида ғолиб ва совриндорлар сафидан жой олган 13 нафар музаффар спортчиларимиз ҳам бор эди. Улардан бири Шаҳрам Ғиёсовдир.

Бокс баҳсларида кумуш медални қўлга киритган Бухоро бокс мактаби тарбияланувчиси “Ўзбекистон ифтихори” фахрий унвони билан тақдирланди.

“Таассуротлар бир олам. Уларни сўз билан тасвирлаш мушкул. Ўйлайманки, нафақат спортчилар, балки ҳар бир инсон Президентимизнинг қўлларидан давлат унвонини олишни орзу қилади.

Ана шу бахт менга насиб этди. “Ўзбекистон ифтихори” фахрий унвони билан тақдирландим. Орзуларимдан бири амалга ошди. Бу менга келгуси фаолиятимда қўшимча куч бағишлайди”, - дея ўз қувончини изҳор қилди Ш.Ғиёсов.