Sharjah Masters 2025. 7-турда ўзбек дербиси, Ниғматовда ғалаба, Нодирбек пешқадам билан ўйнади

Мукофот жамғармаси 73 000 АҚШ долларини ташкил этувчи ушбу мусобақанинг кучлилар жам бўлган "Masters" гуруҳида тўрт нафар гроссмейстеримиз - Нодирбек Абдусатторов, Жаҳонгир Воҳидов, Муҳиддин Мадаминов ва Ортиқ Ниғматов ҳам совринли ўринлар учун баҳс олиб боришмоқда. 

Кеча мусобақада 7-тур учрашувлари бўлиб ўтди. Мусобақада биринчи рақам остида сараланган Нодирбек Абдусатторов биринчи доскада қора доналарда турнирнинг иккинчи рақамли шахматчиси, нидерландиядик Аниш Гирига қарши баҳс олиб борди ва дурангга рози бўлди. Ҳамюртимиз турнир жадвалида 5 очко билан соф иккинчи ўринга кўтарилиб олди. Гири 5,5 очко билан пешқадамликни давом эттирмоқда.  

Sharjah Masters 2025 турнирининг 7-турида ўзбек дербиси кузатилди. Жаҳонгир Воҳидов ва Муҳиддин Мадаминов ўзаро учрашувда 15-юришдан сўнг дурангга имзо чекишди. Ҳар икки гроссмейстеримизнинг очкоси 2 тага етди. Ортиқ Ниғматов бу турда оқ доналарда россиялик гроссмейстер Алексей Гребневни мағлубиятга учратди. Бу билан унинг очколари 4 тага етди. 

Саккизинчи тур олдидан Аниш Гири 5,5 очко билан якка пешқадам бўлиб турибди. Нодирбек Абдусатторов 5 очко билан қўшимча кўрсаткичларга кўра 2-ўринга кўтарилиб олди. Арманистонлик Шант Саргсян, сербияликлар Александар Инджич, Велимир Ивич ҳамда Нодирбекнинг бугунги 8-турдаги рақиби БААлик гроссмейстер Салем Салеҳ ҳисобида ҳам 5 та очко бор. Ортиқ Ниғматов 4 очко билан қўшимча коэфицентларга кўра 24-поғонага кўтарилди. Муҳиддин Мадаминов 76, Жаҳонгир Воҳидов 78-поғонадан жой олган. 

Бугун 8-турда Нодирбек Абдусатторов оқ доналарда ўзи сингари 5 очкога эга амирлик гроссмейстер Салем Салеҳга қарши баҳс олиб боради. Ортиқ Ниғматов қора доналарда руминиялик Дэвид Гаврилескуга қарши ўйнайди. Жаҳонгир Воҳидов қора доналарда бразилиялик Жиованни Вескови, Муҳиддин Мадаминов эса оқ доналарда польшалик Якуб Симаннга қарши ўйнайди.