Sharjah Masters 2025. Иккинчи ўзбек дербисида ҳам Абдусатторов ғалаба қозонди

Мукофот жамғармаси 73 000 АҚШ долларини ташкил этувчи ушбу мусобақанинг кучлилар жам бўлган "Masters" гуруҳида тўрт нафар гроссмейстеримиз - Нодирбек Абдусатторов, Жаҳонгир Воҳидов, Муҳиддин Мадаминов ва Ортиқ Ниғматов ҳам совринли ўринлар учун баҳс олиб боришмоқда. 

Кеча мусобақада 4-тур учрашувлари бўлиб ўтди ва 3-турда бўлгани сингари яна ўзига хос ўзбек дербисига гувоҳ бўлдик. Жаҳонгир Воҳидовга қарши баҳсда турнирдаги илк ғалабасини қўлга киритган Нодирбек Абдусатторов 4-турда оқ доналарда яна бир ҳамюртимиз Ортиқ Ниғматовни ҳам таслим этди. Ниғматов 4-тургача 2 ғалаба ва 1 дуранг билан турнир жадвалида Нодирбекдан юқорида бораётганди.

Афсуски, Sharjah Masters 2025 турнирининг 4-турида қолган икки гроссмейтеримиз мағлубият аламини тотиб кўрди. Муҳиддин Мадаминов қора доналарда мезбонлар вакили Салем Салеҳга, Жаҳонгир Воҳидов ҳама қора доналарда хитойлик Панг Таога имкониятни бой бериб қўйди. 

Биринчи доскада икки яримтадан очко жамғарган россиялик Иван Землянский ва нидерландиялик Аниш Гири учрашуви бўлиб ўтди. Унда Нодирбекдан кейин иккинчи рақам остида таснифланган Гири зафар қучди.