Sharjah Masters. Ўзбек дербисида Абдусатторов устун, Мадаминов ва Ниғматовда ҳам ғалаба

Мукофот жамғармаси 73 000 АҚШ долларини ташкил этувчи ушбу мусобақанинг кучлилар жам бўлган "Masters" гуруҳида тўрт нафар гроссмейстеримиз - Нодирбек Абдусатторов, Жаҳонгир Воҳидов, Муҳиддин Мадаминов ва Ортиқ Ниғматов ҳам совринли ўринлар учун баҳс олиб боришмоқда. 

Мусобақанинг 3-турида ўзига хос ўзбек дербисига гувоҳ бўлдик. Дастлабки икки турда дуранг ўйнаган Нодирбек Абдусатторов қора доналарда Жаҳонгир Воҳидовга қарши баҳс олиб борди ва ғалаба қозонди. Биринчи турда мағлубиятга учраган Воҳидов иккинчи партияда ғалаба қозонганди. Дербида тажриба ўз сўзини айтди. 

Sharjah Masters 2025 турнирининг 3-турида Ортиқ Ниғматов оқ доналарда АҚШ шахматчиси Акобян Варужан билан ҳисоб-китоб қилди ва муҳим ғалабани қўлга киритди. Ниғматов кеча 2-турда ҳиндистонлик Санкалп Гуптани ҳам таслим этганди. Муҳиддин Мадаминов эса кеча 3-турда рейтингда ўзидан юқорида бораётган айнан Гуптани мағлуб этишни уддалади. Ҳинд гроссмейстери кетма-кет икки мағлубиятини ўзбекистонлик шахматчилардан қабул қилиб олди.