Шарофиддин Лутфуллаевга «Мард ўғлон» давлат мукофоти топширилди

Қувонарлиси, мукофотга лойиқ кўрилган 28 нафар ўғлон орасида дзюдо бўйича Ўзбекистон терма жамоаси етакчиси, жаҳон чемпионатининг кумуш медали  совриндори, Тошкент давлат иқтисодиёт университетининг 3-босқич талабаси Шарофиддин Лутфуллаев ҳам бор эди. Бугун давлат мукофоти ўз эгасига топширилди. 

Маълумот учун, ушбу мукофот мамлакатимизда амалга оширилаётган кенг кўламли ислоҳотларда фаоллик кўрсатиб, ўзининг билим ва иқтидори, интилувчанлиги ва ташаббускорлиги, ҳалол ва самарали меҳнати билан Ватанимиз тараққиётига муносиб ҳисса қўшиб келаётган, юксак маънавиятли, мустақил фикрловчи, қатъий ҳаётий позиция, кенг дунёқараш ва юқори салоҳиятга эга, халқ манфаати ва юрт истиқболи учун масъулиятни ўз зиммасига олишга қодир бўлган фидойи ва мард ўғлонларимизга тақдим этиб келинмоқда. 

Фурсатдан фойдаланиб, шундай мард ўғлонни дунёга келтириб тарбиялаган ота-онаси, устоз ҳамда мураббийлари, хусусан Бекзод Тўрабоевни, Ўзбекистон дзюдо федерацияси раҳбарияти, мураббийлар штабини муборакбод этамиз. Уларнинг эътибор ҳамда меҳнатларисиз Шарофиддин бундай юксак эътирофга сазовор бўлмас эди.