Шавкат Мирзақулов: “Туркман курашида ҳам олтин олдик”

Келаси йили Туркманистон пойтахтида ташкил этиладиган ёпиқ иншоотлардаги Осиё ўйинлари олдидан кўрик вазифасини ўтаб берган ушбу турнирда қитъамизнинг 16 давлатидан полвонлар гиламга чиқишди. Беллашувлар тўрт йўналишда тўрт кун давом этди. Иштирокчилар белбоғли курашимизнинг классик ва эркин (бунда оёқан чалиш бор) йўналиши ҳамда туркман курашининг эркин ва классик йўналиши бўйича ўзаро куч синашдилар.

Мусобақада 13 эркак ва 5 нафар аёл курашчимиз 4 та олтин, 5 та кумуш ва 23 та бронза медали билан мезбонлардан сўнг умумжамоа ҳисобида иккинчи ўринни банд этди. Кучли учликдан эса қирғизистонлик спортчилар ўрин олишди.

- Мусобақа юксак савияда ўтди, - дейди терма жамоамиз бош мураббийи Шавкат Мирзақулов. – Эркаклар 8, аёллар эса 5та вазнда гиламга чиқишди. Спортчиларимиздан Ҳусниддин Рўзиев нафақат бизнинг балки, туркман йўналишида ҳам олтин медал олди. Гулмира Исматова эса белбоғли курашнинг икки йўналишида ҳам барча рақибларидан устун келди. Кумуш медалларни эса Зоҳид Исмоилов, Бобурмирзо Мўйдинов, Элбек Сотиболдиев, Бобур Тўхтасинов, Шаҳзода Эргашева ҳамда Гулмира Исматова қўлга киритди. Қолган курашчиларимизнинг аксарияти эса шохсупанинг учинчи поғонасидан жой олдилар.

- Учинчи ўрин жуда ҳам кўп-ку?

- Аслида кумуш медалларнинг ҳам бир нечтаси олтин бўлиши керак эди. Мезбонлар билан беллашганда ҳакамлар кўпинча очиқдан-очиқ ғалабани уларга тортиқ қилади. Ярим финалдаги мағлубиятлар ҳам шунинг хисобига ортиб кетди. Аслида кўплаб вакилларимиз олтинга муносиб ҳаракат қилганди.

- Туркман курашининг бизнинг белбоғли курашдан фарқи балки, полвонларимизга қийинчилик туғдиргандир?

- Йўқ, туркман кураши ҳам бизнинг кураш билан деярли бир хил. Фақатгина очко бериш тизими теннисга ўхшаб кетади. Беллашув уч дақиқадан иборат бўлиб, қайси томон икки очкога илгарилаб кетса, ўша ғалаба қозонган хисобланади.

- 2017 йил ўтадиган ёпиқ иншоотлардаги Осиё ўйинларида курашчилар қайси йўналишларда гиламга чиқишади?

- Куни кеча якунига етган “тест турнири”даги каби тўрт йўналишда беллашадилар.