Шахмат Олимпиадаси. Исроил ва Нидерландияга қарши учрашувлар учун жуфтликлар маълум

Дунёнинг икки юзга яқин давлати терма жамоалари қатнашаётган нуфузли мусобақада бугун 6-тур учрашувлари ўтказилади. Амалдаги Олимпиада чемпиони ҳисобланган Ўзбекистон эркаклар терма жамоаси бугун таркибида тўрт нафар гроссмейстери бор Исроилга қарши баҳс олиб боради. Биринчи тахтада Нодирбек Абдусатторов Максим Родштейнга қарши дона суради. 

Бугунги рақибларимиз 3 ғалаба ва 2 дуранг қайд этишган ҳамда турнир жадвалида қўшимча кўрсаткичларга кўра 8 очко билан 20-поғонадан жой олган. Исроил 1-турда Эфиопия терма жамоасини 4:0 ҳисобида мағлуб этиб, кейин кетма-кет Ирландия ва Мўғулистон билан дуранг (2:2) ўйнади. Албанияни 4:0, Колумбияни эса 2,5:1,5 ҳисобида енгди. 

Жами 184 та терма жамоа қатнашаётган аёллар ўртасидаги мусобақада Алексей Дреев мураббийлигидаги Ўзбекистон терма жамоаси ҳам муваффақиятли одимламоқда. Қизларимиз илк турда Гаити давлати шахматчиларини 4:0, 2-турда Анголани 3:1, 3-турда эса анча кучли ҳисобланган мезбон Венгрия терма жамоасини 2,5:1,5, 4-турда таркибида жаҳон чемпиони бўлган Болгарияни 2,5:1,5 ҳисобида енгишди. Кеча ўтказилган 5-турда эса таркибида уч нафар гроссмейстер бўлган, Бутунжаҳон шахмат Олимпиадасининг амалдаги вице-чемпионлари ҳисобланган Грузияга муносиб қаршилик кўрсатиб, 1,5 : 2,5  ҳисобида ютқазиб қўйишди. 

Бугунги рақибаларимиз нидерландияликлар 1-турда Мадагаскарни 4:0, 2-турда Шимолий Македонияни 3,5:0,5, 3-турда Эстонияни 2,5:1,5 ҳисобида мағлуб этишди. Тўртинчи турда таркибида Гулруҳбегим Тоҳиржонова ўйнаётган АҚШга 0,5:3,5 ҳисобида ютқазишди. Кеча ўтказилган 5-турда эса Хорватия терма жамоаси 2,5:1,5 ҳисобида таслим этилди. Нидерландия ҳам биз сингари 4 ғалаба ва 1 мағлубиятга эга. Ўзбекистон 8 очко билан қўшимча кўрсаткичларга кўра 15, Нидерландия эса 26-поғонадан жой олган.  

Маълумот учун, бугунги ҳар икки учрашув бизнинг вақт билан соат 18:15да бошланади.