Шахматчиларимизга эътибор ошмоқда + ФОТО

Шахмат спортини ривожлантиришга шахсан мамлакатимиз раҳбари томонидан эътибор қаратилмоқда. Бунга жавобан шахматчиларимиз ҳам жаҳон ареналарида сезиларли ютуқларга эришиб келишмоқда. 

Бугун пойтахтимизда шахматчиларимизни қўллаб-қувватлашга қаратилган яна бир тадбир ташкил этилди. Унда Ўзбекистон ёшлар сиёсати ва спорт вазирининг биринчи ўринбосари Алишер Саъдуллаев, BMB Trade Group компанияси кузатув кенгаши раиси Бекзод Маматқулов, шахматчиларимиз Умида Омонова ва Ҳумоюн Бекмуродов, ОАВ ходимлари ва бошқалар иштирок этишди.

Тадбир давомида эндиликда шахматчиларимиз Умида Омонова ва Ҳумоюн Бекмуродовга BMB Trade Group компанияси томонидан ҳомийлик қилиниши ҳақида маълум қилинди.

"Ҳар икки шахматчимизнинг ҳам истиқболи бор. Айни пайтда мамлакатимизда 27 нафар гроссмейстер бор. Яқин йилларда улар сонини янада оширамиз. Умида ва Ҳумоюн ҳозирча гроссмейстер эмас. Аммо тўғри йўналтирилган "инвестиция" эвазига уларни 3-4 йил ичида жаҳоннинг топ шахматчилари қаторида кўришимиз мумкин.

Яқин орада бошқа шахматчиларимизга ҳам мана шундай ҳомийлар бириктирилиши режаси бор", - деди Алишер Саъдуллаев тадбир давомида.

Ўз навбатида шахматчилар бундай эътибордан хурсанд эканликларини қайд этишди.