Шифокор Конорнинг жароҳат асоратларини батафсил таҳлил қилиб берди

Ариэль Хельвани подкастида Саттерернинг таъкидлашича, агар ирландияликнинг олдинги хочсимон бойлами узилганлиги тасдиқланса, тикланиш тахминан 10-12 ой давом этади ва Макгрегор 2021 йилда олган оёқ синишидан кўра анча оғирроқ кечади.

Шифокорнинг айтишича, асосий қийинчилик операциянинг ўзида эмас, балки узоқ муддатли реабилитация ва тизза бўғими барқарорлигини тиклашда. Шу билан бирга, агар жароҳат мениск билан чекланса ва шикастланган тўқиманинг фақат бир қисмини олиб ташлаш керак бўлса, Макгрегор тахминан олти ҳафтадан сўнг машғулотларга қайтиши ва назарий жиҳатдан йил охиригача жанг қилиши мумкин.

Конор 39 ёшда бўлишига қарамай, Саттерер эҳтимолий операция ирландияликнинг фаолиятига чек қўйиши керак деб ҳисобламайди.

"Агар тикланиш муваффақиятли ўтса, унинг яна октагонга қайтишига ҳеч қандай сабаб кўрмаяпман. Шунчаки 39 ёшда аввалги даражага қайтиш 21 ёшга қараганда анча қийинроқ", - деди Саттерер подкастда.