Шомуродовнинг трансфери польшалик қизалоқнинг оиласи топилишда ёрдам берди

Элдор Шомуродовнинг "Рома"га ўтиши клубга нафақат майдонда (Конференциялар Лигасидаги дебют ўйинда гол, А Серия 1-турида ассист), балки арена ташқарисида ҳам катта омад олиб келди.

Ўзбек форвардининг Рим клубига ўтиши ҳақидаги эълон польшалик қизчани топишда ёрдам берди. Қандай қилиб дейсизми? Гап шундаки, "Рома" 2019 йилдан буён кўпроқ эътибор жалб қилиш учун дунёнинг турли бурчакларидан йўқолган болалар фотосуратини трансфер видеоларига ҳам киритиб кетади. Клуб шу тариқа ўша болаларга кўпроқ эътибор жалб қилинишига эришишга ҳаракат қилади. Агар кимдир йўқолган бўлса, клуб у билан боғланиш мумкин бўлган хайрия ташкилотларининг рақамларини қолдиради.

Шомуродов билан бўлган омадли ҳодисани қўшиб ҳисобласак, "Рома" Буюк Британия, Италия, Греция, Бельгия, Кения ва энди эса Польшадан умумий 12 нафар болакай топилишида кўмаклашди.

Элдор бундан жуда бахтиёр:

"Бир боланинг топилиши ва бу билан бир оиланинг ташвиши енгиллашишида қайсидир маънода менинг ҳам ҳиссам қўшилганидан жуда хурсандман. Футбол оламидаги машҳурлигини яхшиликка сарфлайдиган клубнинг бир бўлаги эканимдан фахрланаман".

"Бу кампанияни барчамиз қўллаб-қувватлаймиз. Клуб 12 нафар бола оиласи бағрига қайтишига ёрдам берганидан фахрланади, — дейди клубнинг маркетинг бўйича директори Макс ван ден Дул. — Лекин албатта, асосий ишни ташкилотлар бажаради. Улар бизга қўнғироқ қилиб, яна бир болакай ўз оиласини топгани ҳақида хабар беришади. Бундай хабарларни эшитиб, тўғриси, бошимиз осмонга етади".

Нозима Зарипова таржимаси