Шон О'Мэлли: "Волкановски Махачевни енгмаса, билмадим яна ким мағлуб этади..."

Энг енгил вазнда америкалик UFC жангчиси, 28 ёшли Шон О'Мэлли (16-1-1) енгил вазн чемпиони, россиялик Ислам Махачев (23-1)нинг ярименгил вазн чемпиони, австралиялик Александр Волкановски (25-1)га қарши бўлажак ҳимоя жанги ҳақида гапирди.

Ислам Махачев — Алекс Волкановски жанги 11 февраль куни Австралиянинг Перт шаҳрида ташкил этиладиган UFC 284 турнири доирасида бўлиб ўтади.

"Алекснинг Махачевни мағлуб этиши жуда қийин бўлади. Аммо Волкановски Ислам учун кўпчилик ўйлаганидан-да кўпроқ қийинчилик туғдира олади, деган фикр ҳам бор. У ҳатто ғалаба қозониши ҳам мумкин. Агар Волкановски Махачевни мағлуб эта олмаса, билмадим уни ким юта олар экан?", - деди О'Мэлли Helen Yee Sports ахборот нашрига берган интервьюсида.

Шон О'Мэлли сўнгги бор 2022 йилнинг 22 октябрь санасида Абу-Даби (БАА)да ташкил этилган UFC 280 мусобақаси доирасида россиялик Петр Ян (16-4)га қарши октагонга кўтарилиб, ҳакамларнинг қарори эвазига ғалаба қозонган эди.