Собиқ UFC жангчиси Саидёқуб Қаҳрамонов икки йиллик танаффусдан кейин яна ММАга қайтмоқда. Унинг рақиби, жанг санаси ва манзили маълум!

29 ёшли ҳамюртимиз 29 март тонгида АҚШнинг Айова штати, Айова шаҳрида ташкил этиладиган ММА бўйича XFC 52 турнирида октагонга кўтарилади. Қаҳрамоновга ўша куни бразилиялик Бруно Сантос рақиб бўлади. 

Қизиғи, Сантос ўрта вазнли спортчи ҳисобланади, Саидёқуб эса ўз жангларини энг енгил вазн тоифасида ўтказиб келади. Мазкур беллашув айнан ўрта вазн тоифасида ташкил этилади.

Маълумот ўрнида, самарқандлик Саидёқуб Қаҳрамонов 2021-2022 йиллар давомида UFC'да 3 та жанг ўтказиб, 2 ғалаба ва 1 мағлубият қайд этган. Унинг ҳисобида жами 11 ғалаба ва 3 та мағлубият бор. Ҳамюртимиз ММА қоидалари бўйича сўнгги жангини 2023 йилнинг май ойида Рафаэль Костага қарши ўтказиб, ғолиб бўлганди.

Бруно Сантос эса фаолияти давомида ҳозиргача 24 та жанг ўтказиб, 19 та ғалаба ва 5 та мағлубиятни ўз ҳисобига ёздириб қўйган.