София Гран-приси. Бугун Шокин, Турсунқулова ва Осипова даянга чиқади

Ушбу нуфузли мусобақада ўзбекистонлик олти нафар таэквондочи иштирок этишидан хабарингиз бор. Кеча Гран-прининг илк кунида ҳамюртимиз Чарос Қаюмова иштирок этганди. Бугун эса бир йўла уч нафар таэквондочимиз баҳсларни бошлайди. 

Қуръага кўра Чиба Гран-приси бронза медали соҳибаси Нигора Турсунқулова 1/16 грециялик Атанасия Митсопулуга қарши даянга чиқади. Ушбу жангда ғолиб чиққан таэквондочи нимчорак финалда Матея Йелич (Хорватия) - Индра Краен (Бельгия) учрашуви ғолибаси билан тўқнаш келади. 

Операциядан сўнг тикланиб сафга қайтган Дмитрий Шокин эса Гран-прини хитойлик Сун Хонгйига қарши баҳс билан бошлайди. Бу жанг ғолиби 1/8 финалда Иван Конрад Трайкович (Словения) - Михайло Шелест (Украина) баҳси ғолибига қарши даянга чиқади. 

Чиба Гран-присида бронза медаль олган яна бир таэквондочи Светлана Осипова Софиядаги мусобақани австриялик Марине Яхлга қарши баҳс билан бошлайди. Бу жангда ғолиб чиққан спортчи 1-рақамда сараланган британиялик Бьянка Уолкден билан тўқнаш келади. 

Эслатиб ўтамиз, Софиядаги Гран-прининг сўнги учинчи кунида Никита Рафалович ва Мадинабону Маннопова даянга чиқишади.