Соҳил волейболи: ҳамюртларимизнинг халқаро майдондаги дебюти қандай чиқмоқда?

Мазкур турнир доирасида мамлакатимизда соҳил волейболини ривожлантириш мақсадида халқаро семинар ҳам ташкил этилди.

Кўрилган амалий ҳаракатлар натижасида қисқа муддатда соҳил волейболи бўйича терма жамоа шакллантирилди. Шу кунларда улар ўзларининг дастлабки халқаро мусобақасида иштирок этишмоқда.

7-9 май кунлари Олма-Ота шаҳрида қозоғистонлик таниқли шоир, ёзувчи, адабиётшунос, қолаверса давлат ва жамоат арбоби Олжас Сулейманов таваллудининг 85 йиллигига бағишлаб ҳаваскорлар ва профессионаллар ўртасида халқаро турнир ташкил этилди. Унда ўзбекистонлик волейболчилар ҳам ўз омадини синаб кўришяпти.

Мусобақа учта йўналишда, яъни 2х2 (эркаклар ва аёллар), 4х4 (эркаклар ва аёллар) ҳамда фахрийлар (+40 ёш ва +50 ёш) ўртасида ташкил этилди.

2х2 йўналишида ватанимиз шарафини иккита жамоа ҳимоя қилди. Агар Ўзбекистон-2 жамоаси биттадан ғалаба, дуранг ва мағлубият билан ўз иштирокини анча эрта якунлаган бўлса, Ўзбекистон-1 жамоаси эса ярим финалгача етиб борди ва бўлғуси чемпионларга имкониятни бой берди.

4х4 йўналишидаги мусобақаларда иштирок этаётган жамоамиз эса финалга йўл олди ва улар эртага олтин медаль учун қум устига чиқади.

Шунингдек, эртага фахрийлар ўртасида ҳам мусобақа ташкил этилади. Ушбу йўналишда ҳам ўзбекистонлик спортчилар ўз имкониятларини синовдан ўтказишади.

Бўлажак ўйинларда вакилларимизга омад тилаймиз.