“Спортни сев, спорт билан яша!”: Қораўзаклик волейболчилар Қорақалпоғистонда тенгсиз

Ўзбекистон Республикаси Президентининг 2020 йил 30 октябрдаги “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги ПФ-6099-сон Фармон ижросини таъминлаш, аҳолини кенг спортга жалб этиш мақсадида Жисмоний тарбия ва спорт вазирлиги ҳамда Миллий олимпия қўмитаси ташаббуси билан “Спортни сев, спорт билан яша!” шиори остида Республика оммавий мусобақаси ўтказилмоқда. Қорақалпоғистонда ҳам мусобақанинг январь ойлиги якунланди.

Режага кўра, ушбу ҳудудда волейбол бўйича беллашувлар бўлиб ўтди. 1 ой давом этган ҳудудий босқич беллашувларида 160 нафар ҳаваскор волейболчилар 16 та жамоага бўлинган ҳолда баҳс олиб боришди. Финал беллашувлари 30-31 январь кунлари Нукус шаҳридаги 1-БЎСМда ташкил этилди. Саралаш босқичларида барча рақибларини доғда қолдирган Қораўзак ва Шуманай тумани вакиллари ғолиблик учун майдонга чиқишди. Қизиқарли ва шиддатли ўтган финал беллашуви қораўзаклик волейболчилар фойдасига ҳал бўлди. Учинчи ўрин эса Тахиатош тумани жамоасига насиб этди.

Мусобақанинг тақдирлаш маросими ҳам кўтаринки руҳда ўтиб, унда МОҚ, Қорақалпоғистон Республикаси Жисмоний тарбия ва спорт вазирлиги, ЎзЛиДеп, Ёшлар агентлиги, Миллий гвардия қўмондонлиги мутасаддилари иштирок этишди. Энди қорақалпоқлик ёшлар февраль ойида стол тенниси бўйича ўз имкониятларини синовдан ўтказишади.