"Странжа" мусобақасида қатнашган ўзбек боксчилари 6 та олтин медаль қўлга киритишди, умумжамоа ҳисобида биринчимиз!

"Кичик жаҳон чемпионати" сифатида эътироф этиладиган мазкур турнир ўз тарихида 73-маротаба ташкил этилди. Унда жаҳоннинг 37 мамлакатидан 370 нафардан ортиқ эркак ва аёл боксчилари иштирок этишди. 

Мусобақа эркаклар ўртасида 13, аёллар ўртасида эса 12 та вазн тоифасида ташкил этилди. Ўзбекистон терма жамоаси мазкур турнирда 8 нафар эркак ва 5 нафар аёл боксчи билан қатнашиб, 6 та олтин ва 1 та бронза медалини қўлга киритди. 

Қувонарлиси мусобақа якунига кўра, Ўзбекистон терма жамоаси 6 та олтин медаль билан умумжамоа ҳисобида биринчи ўринни эгаллади. Россия терма жамоаси эса 5 та олтин билан иккинчи ўриндан жой олди (2 та эркаклар, 3 та аёллар). Кучли учликка эса Қозоғистон терма жамоаси 4 та олтин медаль билан якун ясади (2 та эркаклар, 2 та аёллар). 

Терма жамоамиз сафида қуйидаги боксчиларимиз совриндор бўлишди: 

Олтин: 

-51 кг: Ҳасанбой Дўсматов 

-57 кг: Абдумалик Халаков

-63,5 кг: Мужибилло Турсунов

-80 кг: Одилжон Аслонов

-92 кг: Мадияр Саидраҳимов

+92 кг: Лазизбек Мулложонов

Бронза: 

-52 кг: Турсуной Раҳимова 

Ўзбекистон терма жамоаси 28 февралдан 1 мартга ўтар кечаси соат 02:00да юртимизга қайтиб келади. Боксчиларимизни кутиб олишни истаган ОАВ ходимлари ва мухлисларимизни Ислом Каримов номидаги Тошкент халқаро аэропортига чорлаб қоламиз. 

Ўзбекистон бокс федерацияси матбуот хизмати