Сув полоси. Ўзбекистон чемпионати қизғин давом этмоқда

Эркаклар жамоалари ўртасида гуруҳ босқичининг сўнгги тур ўйинлари ўтказилиб, ўз гуруҳларида биринчи ва иккинчи ўринларни банд этган жамоалар плей-офф босқичига йўлланма олишди.

Жумладан, “А” гуруҳида бўлиб ўтган учинчи турда Наманган вилояти ва Республика олий спорт маҳорати мактаби жамоалари биринчи ўрин учун ўзаро куч синашдилар. Учрашув кутилганидек ғоятда муросасиз рухда кечди. Ҳар икки жамоа ҳам сузиш ҳавзасига фақат ғалаба иштиёқида тушганликларини дастлабки дақиқаларданоқ намойиш эта бошлашди.

Қарама-қарши хужумлар остида кечган ўйин 17:14 ҳисобида мезбонлар фойдасига ҳал бўлди ва улар гуруҳ босиқични биринчи ўринда якунлашди. Ушбу гуруҳда бўлиб ўтган иккинчи ўйинда Ўзбекистон сузиш федерацияси жамоаси Фарғона шаҳри жамоасини 15:2 ҳисобида мағлуб этишди. 

Шу тариқа, Республика сузиш федерацияси жамоаси гуруҳда учинчи ўринни эгаллади ва улар эндиликда “В” гуруҳида учинчи ўринни банд этган Наманган шаҳри жамоаси билан 5-6 ўринлар учун ўзаро куч синашадилар.

“В” гуруҳида биринчи ўринни Наманган вилояти ихтисослаштирилган болалар ва ўсмирлар спорт мактаби жамоаси банд этди. Сўнгги турда улар “Ёшлик” клуби устидан 20:3 ҳисобида зафар қучишди.

Ушбу гуруҳда иккинчи ўринни Тошкент шаҳри жамоаси эгаллади. Пойтахтлик ватерполчилар учинчи турда Наманган шаҳри жамоасидан 14:9 ҳисобида устун келишди.

Аёллар ўртасида ўтказилган учинчи тур бахсларида қуйидаги натижалар қайд этилди:

ИБЎСМ (Наманган) – Ўзбекистон сузиш федерацияси 0:17

Наманган вилояти – Тошкент шаҳри 8:20

Наманган шаҳри – Хоразм вилояти 9:3

Эслатиб ўтамиз, хотин-қизлар жамоалари ўртасидаги баҳслар айлана тизимда ўтказиляпти.