06 сен 07:53
Янгиликлар

Теннис

Свитолинани мағлуб этган Серена 10-маротаба US Open финалига чиқди

АҚШнинг Нью-Йорк шаҳрида ўтказилаётган “Катта Дубулға” туркумига кирувчи US Open турнири ўзининг ҳал қилувчи палласига кирди.

Аёллар ўртасидаги мусобақанинг яккалик баҳсларида илк финалчининг номи маълум бўлди. Дунёнинг саккизинчи ракеткаси бўлиб турган америкалик Серена Уильямс ўз фаолиятида 10-маротаба АҚШ Очиқ чемпионатининг финалига йўл олди.

Серена 1 соату 11 дақиқа давом этган ярим финал учрашувида WTA рейтингида 5-поғонадан жой олган Свитолинани ортиқча қийинчиликсиз 6:3, 6:1 ҳисобида таслим этди. Уильямснинг ҳал қилувчи финал баҳсидаги рақибаси айни дақиқаларда давом этаётган Белинда Бенчич (Швейцария) - Бьянка Андрееску (Канада) учрашувидан сўнг маълум бўлади.

Маълумот учун, Серена Уильямс US Open турнирининг олти карра ғолибаси ҳисобланади. Ўтган йили у финалда япониялик Наоми Осакага имкониятни бой берган эди.