21 авг 22:31
Янгиликлар

Таэквондо ИТФ бўйича онлайн Ўзбекистон чемпионати якунланди
Ўзбекистон Республикаси Жисмоний тарбия ва спорт вазирлиги ва Ўзбекистон таэквондо ИТФ миллий ассоциацияси ташаббуси билан ўтказилаётган мусобақада 500 нафардан ортиқ иштирокчилар ғолиблик учун кураш олиб боришди.
Мазкур мусобақа таэквондо ИТФ бўйича профессионал равишда шуғулланаётган спортчиларимизнинг жисмоний тайёргарликларини ошириш ва иқтидорли спортчиларни терма жамоа учун саралаш вазифасини ўтаб беради.
15 август куни старт олган мусобақанинг финал баҳслари 19-20 август кунлари ўтказилиб, ғолиб ва совриндорлар тўлиқ аниқланди.
Ҳакамлар ҳайъати қарорига кўра, умумжамоа ҳисобида Тошкент шаҳри таэквондочилари биринчи ўринни, Бухоро вилояти вакиллари иккинчи ўринни, Тошкент ва Сирдарё вилоятлари спортчилари тегишли равишда учинчи ва тўртинчи ўринларни қўлга киритишди.
Якунида ғолиб ва совриндор деб топилган спортчилар ташкилотчилар томонидан махсус диплом ва эсдалик совғалари билан тақдирланади.
Фикрлар