Таэквондо. Тошкентда Жаҳон чемпионатининг тантанали очилиш маросими бўлиб ўтди + ФОТОГАЛЕРЕЯ

Ушбу мусобақада сайёрамизнинг 67 та мамлакатидан келган 850 дан ортиқ спортчи ҳамда мураббий иштирок этмоқда. 

Бироз олдин "Универсал" спорт мажмуасида Жаҳон чемпионатининг тантанали очилиш маросими бўлиб ўтди. Очилиш маросимида кеча юртимизга ташриф буюрган Бутунжаҳон таэквондо федерацияси президенти Чунгвон Чой сўзга чиқди ва ўз нутқини ўзбекчада "Ассалому алайкум" деб бошлагани мажмуага йиғилганларнинг олқишига сабаб бўлди. 

"Барча иштирокчиларни мусобақа очилиш маросими билан муборакбод этаман. Сизлар аллақачон ғолибсизлар, сабаби Жаҳон чемпионатида иштирок этишнинг ўзи катта ғалаба. Ушбу мусобақада қатнашаётган таэквондочиларга 2020 йил Токиодаги ёки 2024 йил Париж мезбонлик қиладиган Олимпиадага чиқишларини тилайман. Шунингдек Ўзбекистон таэквондо WTF ассоциациясига яқинда тайинланган янги раҳбар Шерзод Тошматовга омад ва зафарлар тилайман", - деди Чунгвон Чой. 

Шундан сўнг Ўзбекистон бош вазири ўринбосари Азиз Абдуҳакимов сўзга чиқди: 

"Бутунжаҳон таэквондо федерацияси президенти жаноб Чунгвон Чой Ўзбекистонга хуш келибсиз. Тошкент мана шундай нуфузли мусобақани қабул қилганидан хурсандмиз. Барча иштирокчиларни бошланган Жаҳон чемпионати билан муборакбод этаман. Тошкентдаги мана шу мусобақада 1000га яқин қатнашчи ғолиблик учун кураш олиб бормоқда. Бугунги кунда Ўзбекистонда таэквондо спорт тури билан 20000дан зиёд киши шуғулланётгани қувонарли ҳол албатта".  

Сўнгра расмий қасамёд маросими бўлиб ўтди. Унда ҳакам, мураббий, ўғил бола таэквондочи ва қиз бола таэквондочи иштирок этиб мусобақада ҳалоллик биринчи ўринда бўлишига қасамёд қилишди. 

Очилиш маросими ажойиб концерт дастури билан давом эттирилди. 

Ўзбекистон таэквондо федерацияси матбуот хизмати

Фото: Толибжон Қосимов