Таэквондочиларимиз Осиё чемпионатида 12 та медаль қўлга киритдилар

Унда қитъамизнинг 18 мамлакати вакиллари иштирок этди. Чемпионатда Собир Назаралиев бошчилигидаги терма жамоамиз аъзолари муваффақиятли иштирок этди.

Кеча терма жамоамиз аъзолар керуги йўналишида ўз чиқишларини давом эттиришди. -33 кг вазнда баҳсларда иштирок этган Даниил Ким ярим финалда кореялик рақибига 20:25 ҳисобида имкониятни бой бериб, бронза билан кифояланди. -59 кг да ўз имкониятини синовдан ўтказган Ирода Миртожиева ҳам финал йўлланмаси учун курашда мезбонлар вакиласига мағлуб бўлди (16:37) ва шоҳсупанинг 3-поғонасидан жой олди.

+59 кг ли спортчимиз Ксения Смирнова эронлик спортчига ортиқча қаршилик кўрсата олмади ва у ҳам навбатдаги бронзани терма жамоамизга тақдим этди.

-37 кг гача бўлган вазнда Амир Тўраев финалгача муваффақиятли етиб борди ва бош соврин учун баҳсда эронлик рақибига кичик ҳисобда (10:16) имкониятни бой бериб, кумуш билан чегараланди.

-29 кг да даянга чиққан Муниса Каримова Жанубий кореялик тажрибали спортчига қарши финал учрашувида (4:24) мағлубиятга учради ва кумуш медаль чегарасида қолди.

Эслатиб ўтамиз, чемпионатнинг биринчи куни пумсе йўналишида Ирода Умрзоқова олтин, Айнур Умрзоқова ва Исломбек Ражабоев яккалик пумседа, Ирода Умрзоқова ҳамда Исломбек Ражабоев жуфтлик чиқишларида бронза медалларини қўлга киритган эди.

-45 кг гача бўлган вазнда Азизбек Раҳмонбердиев мамлакатимиз кадетлари ҳисобига илк олтин медални расмийлаштирган эди. 

-41 кг вазнда Севинч Мусирова эса бронза медали соҳибаси бўлганди.

Шундай қилиб, Ўзбекистон кадетлар терма жамоаси Осиё чемпионатида 2тадан олтин ва кумуш ва 8 бронза медалини қўлга киритишди.

Спортчиларимиз 9 июнь куни Тошкентга қайтиб келишади.