Таэквондочиларимиздан онлайн машғулот ва мастер-класс

Кеча икки спорт турида онлайн мусобақалар старт олган бўлса, Ўзбекистон таэквондо WT ассоциацияси томонидан онлайн тадбирлар ўтказилди. Улардан бири куннинг биринчи ярмида терма жамоа тренерлари иштирокида Республикамизнинг Қашқадарё, Сурхондарё ва Навоий вилоятларида фаолият олиб бораётган ҳамкасблар учун онлайн мастер-класс ташкил қилинди.

Унда асосий жамоа устози Александр Ким ҳамда ўсмирлар жамоаси мураббийи Собир Назаралиев ўз билим ва маҳоратлари билан ўртоқлашишди. Ушбу вилоятлардаги ёш таэквондочиларнинг машғулотини кузатиб, техникани ошириш борасида тегишли кўрсатмаларини бериб ўтишди. Сўнг мураббийлар учун терма жамоада фаолият олиб бораётган кореялик мутахассис Ким Юнг Жинг методикаси асосида ишланган замонавий тактик ва техник усулларни ўзида мужассамлаштирган видеоролик қўйиб берилди.

Куннинг иккинчи ярмида асосий терма жамоамиз ўзининг онлайн машғулотини олиб борди. Ўзбекистон таэквондо ассоциацияси базасида шуғулланаётган спортчиларимиз дастлаб чигалёзди машқларини бажаришгач, машғулот давомида асосий қўлланиладиган зарбалар, ҳимоявий тактикалар устида ишлашди.