Талаба-спортчилар югуриш мусобақасида устозлар байрамини нишонлашди ФОТОРЕПОРТАЖ

Айнан оммавий спорт тарғиботчиларини, профессионал спорт мураббий ва мутахассисларини тайёрлайдиган таянч олий ўқув юрти ҳисобланган Ўзбекистон давлат жисмоний тарбия ва спорт университетида 1-октабрь – Ўқитувчи ва мураббийлар куни»га бағишлаб илк бор турли ёш тоифасида кросс югуриш мусобақаси ташкил этилди.

Байрамона тарзда уюштирилган югуриш мусобақалари эрта тонгдан барчани соғлом турмуш тарзига ошно этди.

300 нафарга яқин профессор-ўқитувчилар, олийгоҳнинг ҳамкор хорижий университет вакиллари, ишчи ходимлар, спорт турлари бўйича терма жамоа аъзолари, 1500 дан зиёд университет ҳамда Чирчиқ шаҳридаги бир қатор олий таълим муассасаси талабалари ва маҳалла ёшларини қамраб олган югуриш мусобақаларининг турли йўналишларида Шерулло Лутфуллаев, Фарҳод Кучаров, Суннатилла Отамуродов, Жавлон Иштаев, Шоҳжаҳон Қиличев, Наталя Асанова Фарида Тўлқинбоева, Сабина Шириева сингари оловқалб ёшлар қатори Иқроржон Солиев, Сурат Усмонхўжаев, Жавлон Иштаев, Умар Тўрақулов, Алёна Тумян, Зулфия Агзамовадек ўқитувчи олимлар ғолиб ва совриндорлар қаторидан жой эгаллади.

Югуриш мусобақаларида талаба спортчилар, маҳалла ёшлари билан бирга бокс, триатлон, енгил атлетика, дзюдо каби бир қатор спорт турлари бўйича Ўзбекистон терма жамоаси аъзолари, жаҳон ва қитъа чемпионлари, фахрий спортчилар, тажрибали мураббийлар иштирок этди.

Тадбирда таъкидланганидек, оммавий спортни ривожлантирмай туриб халқаро спорт майдонларида юксак натижаларга эришиб бўлмайди. Шу маънода, бўлғуси спорт мутахассислари энг аввало оммавий спорт билан, югуриш билан шуғулланиши, бошқаларда ҳам соғлом турмуш тарзига меҳр уйғотмоғи керакки, бу, ёшлар баркамоллигини, аҳоли генофондини соғломлаштиришга қўшилган муносиб ҳисса ҳисобланади.