Тартиб-интизомни бузган дзюдочиларимиз жиддий тарзда огоҳлантирилди

Йиғилишда дзюдочилар томонидан тартиб-интизом қоидаларининг бузилиш ҳолати кўриб чиқилди. Улар федерация билан имзоланган меҳнат шартномасига хилоф иш қилишган. Эркаклар терма жамоасининг 3, аёллар терма жамоасига номзод 4 нафар дзюдочимиз федерация рухсатисиз самбо ҳамда тўй кураши мусобақаларида иштирок этган. 

Халқаро дзюдо федерацияси (IJF) бу каби ҳолатларни кескин қоралайди. Дзюдодан бошқа кураш турларидаги мусобақаларда иштирок этиш қатъиян маън этилади. Бу ҳолат IJF спорт ва ташкилий қоидаларининг 4.1-моддасига кўра жазога тортилади. Боиси, дзюдочи бошқа спорт туридаги мусобақаларда кутилмаган жароҳат орттириб олиши ва бунинг натижасида терма жамоани қийин аҳволда қолдириши мумкин. 

Ўзбекистон дзюдо федерацияси Тартиб-интизом қўмитаси қарорига кўра етти нафар дзюдочимиз жиддий тарзда огоҳлантирилди. Агар бу ҳолат яна такрорланса, уч ойдан бир йилгача бўлган муддатга барча мусобақалардан четлатилади.