Тасанно! 15 ёшли Афруза Ҳамдамова 2-ўрин эгаси билан бир хил очко жамғарди, бир неча жаҳон чемпионини мағлуб этди

Аёллар ўртасидаги дунё биринчилигида ягона вакиламиз Афруза Ҳамдамова (2188) юртимиз шарафини ҳимоя қилмоқда. Ёшлар ўртасида икки карра жаҳон чемпиони бўлган Афруза тарихий натижа қайд этди. У 11 имкониятдан 8 очко жамғариб, қўшимча кўрсаткичларга кўрагина 6-ўринни эгаллади. Афруза сўнгги кун олдидан 5,5 очко билан 15-поғонада бораётганди. 

Ҳамдамова кеча тунда ўтказилган 3 та партиядан 2 тасида ғалаба, 1 тасида дуранг қайд этди. Мусобақа давомида фақат битта учрашувда имкониятни бой берди. Турнирда 83-рақам остида таснифланган Ҳамдамова учун бу ҳақиқатан ҳам тарихий натижа. Афруза 6 ғалаба, 4 дуранг ва 1 мағлубият эвазига 8 очко жамғарди. 

Ҳамюртимиз чемпион Ҳампи Конеру (Ҳиндистон, 2431)дан бор йўғи ярим очко кам тўплади. Кучли учликдан жой олган Жу Вен Жун (Хитой, 2536) ва Катерина Лагно (FIDE, 2433) билан бир хилда очкога эга бўлиб, якунда совринли ўринлардан четда қолгани бироз аламли бўлди. 

Афруза Ҳамдамова мусобақа давомида икки карра жаҳон чемпиони, блиц йўналишида амалдаги жаҳон чемпиони россиялик Валентина Гунина (FIDE, 2388)ни мағлуб этишни уддалади. Қозоғистонлик гроссмейстер, блиц йўналишида икки карра жаҳон чемпиони Бибисара Ассаубаева (2444), россиялик жаҳон чемпиони Катерина Лагно (2433), украиналик жаҳон чемпиони Анна Музичук (2408) сингари номдор рақибалари билан дуранг ўйнади. 

АҚШ шарафини ҳимоя қилаётган Гулруҳбегим Тоҳиржонова 11 имкониятдан 5 очко жамғариб, қўшимча кўрсаткичларга кўра 65-ўрин билан кифояланди. У рапид баҳсларида 3 ғалаба, 4 дуранг ва 4 та мағлубият қайд этди. Гулруҳбегим турнирда 42-рақам остида таснифланганди.