Tata Steel Chess-2023. Нодирбек ҳамон пешқадам, Жавоҳир 2-ўринга кўтарилиб олди (турнир жадвали)

Tata Steel Chess-2023 мусобақасида шахматчиларимиз Нодирбек Абдусатторов ва Жавоҳир Синдаров ҳам муваффақиятли дона суришяпти. Нодирбек "Мастерс", Жавоҳир эса "Челленжер" гуруҳида ўз маҳоратларини намойиш этмоқдалар. 

Кеча ўтказилган 7-тур учрашувларида ҳар икки ёш гроссмейстеримиз ғалаба нашидасини сурди. "Мастерс", яъни кучлилар гуруҳида пешқадамлик қилаётган Нодирбек қора доналарда ўйнашига қарамай, Аржун Эригайсига илк мағлубиятни тақдим этди. Ҳиндистонлик шахматчи бунгача ўтказилган 6 та партиянинг барчасида рақиблари билан дуранг натижа қайд этганди. Абдусатторов 7 имкониятдан 5,5 очко жамғариб, ҳамон якка пешқадамликни давом эттирмоқда. Кучли учликдан жой олган Аниш Гири (Нидерландия) ва Уэсли Со (АҚШ) ҳисобида 4,5 тадан очко бор.  

"Челленжер" гуруҳида қатнашаётган Жавоҳир Синдаров (2654) эса 7-турда нидерландиялик 17 ёшли Элин Роберс (2361)га қарши оқ доналарда ўйнади ва ғалабага эришди. Ҳамюртимиз 7 имкониятдан 5 очко жамғариб, турнир жадвалида 4-поғонадан 2-ўринга кўтарилиб олди. Германиялик Александр Донченко 5,5 очко билан карвонбоши бўлиб турибди. Мустафо Йилмаз (Туркия) 4,5 очко билан 3-ўринга якун ясаган.