Терма жамоамиз Кунчиқар юртда + ФОТО

Ўзбекистон Миллий олимпия қўмитаси раиси ўринбосари, мамлакат дзюдо федерацияси раиси Азизжон Камилов бошчилигидаги терма жамоамиз делегацияси Жанубий Кореянинг Сеул шаҳри орқали Япониянинг Майдзуру шаҳарчасига етиб борди. 

Дзюдочиларимиз Илиас Илиадис ва Нелля Киямова мураббийлигида 19 июлга қадар япон денгизи қирғоқларидаги Киото префектурасига қарашли Майдзуру шаҳрида ўқув-машғулот йиғинини ўтказади. Айнан 19 июль куни Олимпиадада юртимиз шарафини ҳимоя қиладиган дзюдочиларимиз Токиога йўл олса, машғулотларда спарринг вазифасини ўтаб берадиган қолган таркиб Тошкентга қайтиб келади. 

Эслатиб ўтамиз, Токио-2020 Олимпиадасини айнан дзюдо баҳслари бошлаб беради. Мусобақанинг биринчи куни -60 кг вазн тоифасидаги дзюдочимиз, жаҳон чемпионатининг кумуш медали совриндори Шарофиддин Лутфуллаевга мухлислик қиламиз.