Термиз ОЗК билан ўзаро ҳамкорлик Меморандуми имзоланди

Термиз Олимпия захиралари коллежида дзюдо спорт тури нуфузини янада кўтариш, жаҳон ареналарида ёш спортчиларимизнинг юқори натижаларга эришишини таъминлаш ва ўзаро ҳамкорлик алоқаларини ривожлантириш мақсадида Ўзбекистон дзюдо федерацияси билан ҳамкорлик Меморандуми имзоланди. 

Меморандумни Термиз олимпия захиралари коллежи директори Ҳасан Сапаров ҳамда Ўзбекистон дзюдо федерацияси раиси ўринбосари Бекзод Тўрабоевлар имзолашди. 

Шундан сўнг Б.Тўрабоев бошчилигида Термиз ОЗКнинг дзюдо бўлими спортчи-ўқувчилари учун федерация вакиллари томонидан дзюдо қоидаларига киритилган янгилик ва ўзгаришлар тўғрисида ўқув-амалий семинар ҳам ташкил этилди.

Қолаверса, тадбир доирасида Токио-2020 ёзги Олимпия ўйинлари иштирокчилари Шарофиддин Лутфуллаев ҳамда Ҳикматулло Тўраев иштирокида Сурхондарё вилоятидаги энг иқтидорли ёш дзюдочилар учун мастер-класс ҳам ўтказилди.

Ишонамизки, ўзларининг севимли спортчилари билан ўтказилган маҳорат сабоқлари ёшларга катта мотивация бериб, уларни янгидан-янги ғалабалар сари руҳлантиради.