Тиловов ғалаба билан бошлади, Диёр ва Диёрада эса...

Бугун мусобақанинг биринчи куни тўрт нафар дзюдочимиз медаллар ҳамда муҳим рейтинг очколари учун татамига чиқиши ҳақида хабар берган эдик. Ҳамюртларимиздан Муҳриддин Тиловов -66 кг вазн тоифасидаги беллашувларда учинчи даврага йўл олди. Тўғридан-тўғри иккинчи босқичдан баҳсларга қўшилган Муҳриддин грузиялик Баграти Ниниашвилини қўшимча бўлимдаги вазари баҳоси эвазига мағлубиятга учратди. Энди у чорак финал йўлланмаси учун қозоғистонлик Елдос Жумакановга қарши татамига чиқади.

Афсуски, ҳамюртларимиздан икки нафари илк учрашувларидаёқ мағлубият аламини тотиб кўриб, мусобақа билан эрта хайрлашишди. -60 кг вазн тоифасидаги дзюдочимиз, Рио Олимпиадаси совриндори Диёрбек Ўразбоев туркиялик Солиҳ Йилдизга, -52 кг вазндаги Диёра Келдиёрова эса франциялик Астрид Гнетога имкониятни бой берди. Бироздан сўнг -66 кг вазндаги дзюдочимиз Сардор Нуриллаев нигерлик Исмоил Алҳассан билан беллашади.