Токио Олимпиадасига йўл олган бешкурашчимиз Жаҳон кубогида 92 нафар спорт ичида 76-натижани қайд этди

Унда сайёрамизнинг энг кучли бешкурашчилари қаторида Ўзбекистон терма жамоаси аъзоси, Токио-2020 лицензиати Александр Савкин ҳам иштирок этди.

Эркаклар ўртасидаги мусобақада жами 92 нафар атлет 3 гуруҳга бўлинган ҳолда қатнашди. Улардан 30 нафари саралашдан ўтиб, финал босқичига йўл олди. Афсуски, ҳамюртимиз бу борада 76-натижа билан турнирдаги иштирокини якунлади. Ҳамюртимиз қиличбозлик йўналишида ўтган 30 жангдан 17 тасида устун келиб, 13 тасида имкониятни бой берди. 200 метрга кечган сузиш баҳсида эса 2:05.72 дақиқа қайд этди. Мусобақада латвиялик Павелс Шеквос ғалаба қозонди. Иккинчи ўрин мисрлик Аҳмед Ҳамидга насиб этган бўлса, германиялик Патрик Догу кучли учликни якунлаб берди.

Мусобақада иштирок этишдан кўзланган мақсад, аввало, спортчиларимизнинг яхши спорт формасига кириб боришларини таъминлаш, Токио-2020 Олимпиадасига қадар тайёргарликнинг энг юқори чўққисига киришдир. Бу йўлда узоқ муддатли танаффусдан сўнг бўлиб ўтган бундай мусобақалардаги иштирок катта ёрдам беради.

Таъкидлаш жоиз, мусобақада ҳамюртимизнинг иштирокини кузатиб бориш учун Ўзбекистон замонавий бешкураш федерацияси раиси Баҳромжон Газиев Будапештга ташриф буюрди. Сафар давомида Баҳромжон Газиев Халқаро бешкураш федерацияси президенти доктор Клаус Шорман билан учрашиб, бир қатор истиқболли масалаларни муҳокама қилишди.

Қайд этиш жоиз, ушбу спорт турида аёллар ўртасида Токио Олимпиадасига йўлланма олган бошқа бир вакиламиз Алисэ Фахрутдинова кичик жароҳати сабаб мусобақада иштирок этмади. Спортчиларимизнинг келгуси иштирокларида омад тилаб қоламиз.