Тошкент оғир атлетика бўйича жаҳон чемпионатига тайёр

Мазкур йирик спорт анжуманига ер юзининг 50 га яқин давлатидан 350 дан зиёд спортчи ва мураббийлар, мутахассислар ташриф буюрмоқда.

Маълумки, Ўзбекистон нуфузли спорт мусобақаларини ўтказиш бўйича катта тажрибага эга. Бундай салоҳиятга ўз-ўзидан эришилмаган, албатта. Мамлакатимизда жисмоний тарбия ва спортни ривожлантиришга Давлат миқёсида аҳамият берилиши, натижада йигит-қизларимизнинг кўплаб спорт турлари бўйича жаҳон миқёсида залворли ютуқларни қўлга киритиши дунё аҳли эътиборини Ватанимизга қаратди. Жумладан, оғир атлетикачиларимиз ҳам кейинги йилларда нафақат Осиё, балки жаҳоннинг етакчи давлари қаторидан ҳақли равишда ўрин эгаллади. 

Шу боис, эндиликда ушбу спорт тури бўйича энг йирик мусобақаларни ўтказиш мамлакатимизга топширилиши одатий ҳолга айланди. Республикамиз Осиё мусобақаларини жуда кўп марта қабул қилган. 2013 йил Тошкентда II ўсмирлар Олимпия ўйинларига йўлланма берувчи 17 ёшгача бўлган атлетлар ўртасидаги жаҳон чемпионати катта муваффақият билан ўтказилган. 

Мана энди навбатдаги ёш тоифаси – 20 ёшгача бўлган спортчилар ўртасидаги жаҳон чемпионатини ўтказиш ҳуқуқи Ўзбекистонга берилди. Аниқроғи, бу ҳуқуқ шунчаки берилмаслиги кундек равшан. Мамлакатимиздаги сиёсий барқарорлик, тинчлик-хотиржамлик, жисмоний тарбия ва спортга қаратилаётган алоҳида эътибор, спортчи ва мураббийларимизнинг юқори натижалари – Олимпия ўйинлари, жаҳон ва қитъа мусобақаларида доимий равишда қўлга киритилаётган медаллар – буларнинг барчаси мана шундай юксак ишончни таъминлаб берди.