Тошкент Осиёда “Bike city”, яъни “велосипед шаҳри” мақомини олиш сари муҳим қадам ташлади

Юқори мартабали меҳмонга Осиё велоспорт конфедерацияси президенти ёрдамчиси Мариам Мазин Ёқуб Ал-Саббоҳ, АСС ходимлари Абдурахмон Давидов ҳамда Дамико Фабрициолар ҳамроҳлик қилишмоқда.

Бугун эрта тонгдан меҳмонлар Ўзбекистон Республикаси Бош вазирининг ўринбосари – Туризм ва спорт вазири Азиз Абдуҳакимов ҳамроҳлигида Тошкент шаҳрининг марказий кўчалари бўйлаб “Tashkent – bike city” велосайлида иштирок этишди.

“Бугунги кунда соғлом турмуш тарзига риоя қилиш жуда муҳим, айниқса пандемия даврида. Президентимиз томонидан соғлом турмуш тарзини тарғиб қилишга доир кўплаб қарорлар қабул қилинмоқда. Шаҳарлар ичида велойўлаклар ташкил этилмоқда. Биз шу каби инфратузилмаларни яратиш билан бирга аҳолимиз ўртасида турли спорт турларини тарғиб қилишимиз лозим. Бу борада велоспорт энг оммавий спорт тури сифатида айни муддаодир, зеро бу ҳам саломатлик, ҳам экология учун фойда бўлади. Бугунги велосайримизда ҳам Осиё велоспорт конфедерацияси президенти қатнашмоқда, кейинчалик бу каби тадбирларимизда таниқли давлат арбоблари, спортчилар ва санъат намоёндалари ҳам қатнашиб, мухлислар орасида велоспортни тарғиб қилса, велосипеддан фойдаланувчилар сони ортиб, шаҳарларимиз янада кўркам кўриниш олади. Фурсатдан фойдаланиб, барча юртдошларимизни бу каби тадбирларда қатнашишга чорлаб қоламан”, - деди Азиз Абдуҳакимов.

Пойтахтимиздаги “Ҳумо Арена” спорт мажмуасидан старт олган велосайлда Халқ таълими вазири Шерзод Шерматов, Вазирлар Маҳкамаси, шунингдек турли вазирлик ва идораларнинг масъул ходимлари, ёш ва фахрий велоспортчилар, санъаткорлардан иборат жами 100 нафарга яқин юртдошларимиз фаол қатнашди.

Ўз навбатида, бундай тадбирлар ҳамда шаҳар ҳудудида профессионаллар ва ҳаваскорлар иштирокида турли пойгаларнинг ўтказилиши Тошкентнинг “Bike city” халқаро мақомини олиш имкониятини оширади. Қолаверса, юқори давлат бошқаруви органлари ходимлари иштирокида ташкил этилаётган бундай тадбирлар соғлом турмуш тарзини тарғиб қилиш йўлидаги энг яхши воситадир.

Бундан аввал Азиз Абдуҳакимов бошчилигидаги ишчи гуруҳ Тошкент ва Самарқанд шаҳарларидаги велойўлакларни кўздан кечирганига оид хабар берилган эди.