Тошкентда “Мен ғолиб” шиори остида югуриш марафони ўтказилди

Эрта тонгдан пойтахтимизнинг Олмазор туманида жойлашган “Ғалаба боғи” ёдгорлик мажмуасига Мудофаа, Ички ишлар, Фавқулодда вазиятлар вазирликлари, Давлат хавфсизлик хизмати, Давлат божхона қўмитаси, Президент Давлат хавфсизлик хизмати, Миллий гвардия ҳарбий хизматчилари, Қуролли кучлар фахрийлари ҳамда турли вазирликлар ва ташкилотлардан келган меҳмонлар ва спортга бефарқ бўлмаган кўнгилли фуқаролар жамланди.

“Ғалаба боғи” ҳудудида “Мен ғолиб” шиори остида югуриш марафонига старт берилди. Унда иштирок этган марафон қатнашчилари Қорақамиш, Кичик халқа йўли, Сағбон, Олтинсой, Дилсарой кўчалари орқали “Ғалаба боғи”даги финишга етиб келишди.

Мазкур марафон фуқаролар ўртасида соғлом турмуш тарзини тарғиб этиш, ўсиб келаётган ёш авлодни ватанпарварлик руҳида тарбиялаш ҳамда уларни эртанги кунга бўлган ишончини яна-да мустаҳкамлаш мақсадида ташкил этилди.

“Мен ғолиб” шиори остидаги марафонда юрт посбонлари Ватанимиз байроғини баланд кўтариб, белгиланган масофани босиб ўтишди. Бу эса пойтахт кўчаларига байрамона кайфиятни олиб кирди, десак муболаға бўлмайди.

Ҳарбий хизматчилар ўртасидаги марафонда 1-ўринга Мудофаа вазирлиги шарафини ҳимоя қилган Марказий ҳарбий округи ҳарбий хизматчиси, лейтенант Нуриддин Раҳматов сазовор бўлди. 2-ўрин эса Давлат хавфсизлик хизмати вакилига насиб этган бўлса, 3-ўринни ҳам Мудофаа вазирлиги жамоаси вакили қўлга киритди.

Жисмоний имконият, куч ва ироданинг мустаҳкамлигини синовдан ўтказиш имконини берган марафонда олий ҳарбий таълим муассасалари курсантлари орасидан ҳам ғолиблар аниқланди. Унга кўра 3-ўрин Ички ишлар академияси, 2-ўрин Ўзбекистон Республикаси Жамоат хавфсизлиги университети ҳамда 1-ўрин Қуролли кучлар академияси шарафини ҳимоя қилган курсантларга насиб этди.

Умумжамоа ҳисобида 3-ўринни Президент Давлат хавфсизлик хизмати жамоаси эгаллади. 2-ўринни Давлат хавфсизлик хизмати вакиллари қўлга киритишган бўлса, марафоннинг мутлақ ғолиби сифатида Мудофаа вазирлиги жамоаси эътироф этилди. 

Марафон сўнгида ғолиб ва совриндорлар ташкилотчилар томонидан медал, кубок ҳамда эсталик совғалари билан тақдирланишди.