Тошкентда “Спорт олами-2017” VI Халқаро кўргазмаси старт олди

Кўргазманинг асосий мақсади болалар ва ўсмирлар ўртасида жисмоний ривожланиш даражасини ошириш, ёш авлод ўртасида соғлом турмуш тарзини тарғиб қилиш, спорт соҳасида янги технологияларни жорий этиш, модернизациялаш ва спорт соғломлаштириш муассасалари, объектлари ва қурилмаларининг моддий-техник базасини яхшилашдан иборат.

Ушбу кўргазмада қатнашиш спорт соҳасида ўзини танитиш, спорт инвентарлари ва жиҳозлари, спорт кийимлари ва дастгоҳлари ишлаб чиқарувчи компаниялар билан малака алмашиш, шунингдек, ўзаро манфаатли шартномалар тузиш имконини беради.

Кўргазма бўлимлари:

• Спорт жамиятлари: қўмиталар, федерациялар, фондлар, ассоциациялар, марказлар, мактаблар, тўгараклар;
• Спорт мажмуалари ва комплекслар, қурилишлар;
• Спорт инвентарлари ва дастгоҳлар;
• Ўйин-кулги соҳасида спорт;
• Спортнинг техник турлари;
• Спорт озуқалари;
• Спорт кийимлари;
• Спорт таълими;
• Халқ ўйинлари ва миллий спорт турлари.

Кўргазма доирасида Олимпия ва Паралимпия чемпионлари билан учрашувлар, турли спорт мактаблари чиқишлари, конференциялар, семинар ва презентациялар ҳамда мусиқий чиқишлар ўрин олган.