Триатлон: Ўзбекистонлик мураббийлар Москвада малака ошириш дастурини ўтдилар

Ўқув курсларида ҳамюртларимиздан Виктор Зародов, Шохруҳ Юнусов, Николай Ильин ва Жавоҳир Юнусов иштирок этди. 32 соатлик интенсив машғулотлар давомида иштирокчилар маърузаларда қатнашдилар ва назарий билимларни амалда синаб кўрдилар.

Ўзбекистон Триатлон Федерацияси мамлакатда профессионал ва ҳаваскорлар ўртасида триатлонни ривожлантиришни мақсад қилган ва биринчи навбатда мураббийлар малакасини оширишга алоҳида эътибор қаратмоқда. Ҳар бир спорт турида бўлгани каби, триатлонда ҳам мураббийлар малакасини ошириш машғулотлар юқори савияда ташкил этилиши, профессионал триатлончилар ва ҳаваскорларни мусобақаларга тайёрлаш учун муҳим йўналиш ҳисобланади.

Ўқув курси дастури қуйидаги йўналишларни қамраб олди:

•  Йиллик ўқув режалари ва ўқув машғулотларини даврийлаштириш усуллари;

•  Ўқув режалари ва вазифаларини режалаштириш ва янгилаш;

•  Сузиш ва югуришдаги асосий чеклаш хатоларини аниқлаш ва тузатиш;

•  Сузиш, велоспорт ва югуриш бўйича видео-таҳлил.

Дастур натижасига кўра, мураббийлар Федерал жисмоний тарбия ва спорт илмий марказининг малака ошириш сертификатини қўлга киритдилар.

ЦиклОН – 2011-йилда ташкил этилган Федерал спорт таълими тизими. Триатлон академияси дунё спорт юлдузлари орасидан триатлон ва атлетика бўйича энг кучли замонавий мураббийларни бирлаштиради. Курс ўқитувчилари – тажрибали амалий мураббийлар, ўз соҳасидаги мутахассислар ва юқори малакали мураббийлар:

Игорь Сисоев – ЦиклОН бош мураббийи, Россия триатлон терма жамоалари бош мураббийи, триатлон бўйича халқаро даражадаги спорт устаси, Олимпия ўйинлари иштирокчиси, "Триатлон. Олимпия масофаси." китоби муаллифи;

Алексей Соколов – ЦиклОН мураббийи, марафон бўйича халқаро даражадаги спорт устаси, Россия марафони рекордчиси, Олимпия ўйинлари иштирокчиси.

Юрий Кудинов - сузиш бўйича хизмат кўрсатган спорт устаси, очиқ сузиш бўйича беш карра жаҳон чемпиони (25 км), Олимпия ўйинлари иштирокчиси.