"Туран жангчиси" UFC`дан четлатилди

"Туран жангчиси" номи билан танилган ўта енгил вазн тоифаси вакили Бекзат Алмахан бундан буён UFC жангчиси ҳисобланмайди. 28 ёшли Алмахан 2024 йилда қисқа муддатли огоҳлантириш билан UFC`даги дебютини Умар Нурмагомедовга қарши ўтказган эди. Гарчи у жанг бошида россиялик рақибини нокдаун ҳолатига туширишга муваффақ бўлган бўлса-да, якунда ҳакамларнинг якдил қарори билан мағлубиятга учраганди.

Шундан сўнг, қозоғистонлик жангчи Бред Катонани 64 сония ичида нокаутга учратди, бироқ кейинчалик яна икки бор мағлубият аламини тотиб кўрди. У Александр Топурия ва Жан Мацумотога қарши жангларда ҳакамларнинг бир овоздан қабул қилган қарори билан ютқазди (гарчи охирги жанг натижаси кўпчилик томонидан баҳсли деб ҳисобланса ҳам).

Агар жангчи бошқа лигаларда бир нечта ишончли ғалабаларга эриша олса, унинг UFC`га қайтиш имконияти ҳали ҳам сақланиб қолиши истисно этилмаяпти.