Уч нафар теннисчимиз Тошкентда ўтаётган турнирнинг 1/4 финалида ўйнайди

M15 Tashkent 2 турнирининг мукофот жамғармаси 15 000 АҚШ долларидан иборат бўлиб, унда бир неча нафар теннисчиларимиз ўз имкониятларини синаб кўришяпти. Улардан уч нафари чорак финалга етиб келди. 

Мамлакатимизнинг иккинчи ракеткаси Сергей Фомин 46 дақиқа давом этган 1/8 финалда ATP рейтингида 1860-поғонада бораётган россиялик Дмитрий Долженковни 6/1, 6/0 ҳисобида мағлубиятга учратди. Фомин дунёнинг 453-ракеткаси бўлиб турибди.

Учинчи ракеткамиз Амир Милушев 2 соату 11 дақиқалик 1/8 финал баҳсида рейтингда ўзидан 655 поғона юқорида бораётган россиялик Аристарх Сафоновдан 4/6, 6/2, 6/4 ҳисобида устун келди. Сафонов Тошкент турнирида еттинчи рақам остида таснифланган эди. 

Тўртинчи ракеткамиз Максим Шин эса рейтингда ўзидан салкам 400 поғона юқорида бораётган ҳиндистонлик Бхарат Кумаранни икки сетда ҳам бир хил ҳисобда мағлубиятга учратди - 6/3, 6/3.