UFC Барберена - Раҳмонов жангига кўнмади

UFC қозоғистонлик Шавкат Раҳмонов (16-0) билан жанг ташкил қилиб беришни сўраган америкалик Брайан Барберена (18-9)га рад жавобини берди. Бу ҳақда Брайаннинг ўзи маълум қилган.

"Менга Раҳмонов билан жанг қилмаслигимни айтишди. Охирги жангимдан кейин бундай имкониятга лойиқ эмаслигимни биламан, лекин бу йил икки ғалабага ҳам эришдим ва ўйлайманки, ҳар бир жанг индувидуал ҳаракатларга боғлиқ. Мен жуда хавфли жангчиман. Ишончим комилки, мен Раҳмоновни мағлуб эта оламан ва мухлисларга хоҳлаган нарсаларини бера оламан. Аммо якуний сўзни ҳар доим UFC айтади", - деб ёзган Барберена ижтимоий тармоқлардаги расмий саҳифасида.

Раҳмонов 14 январь куни Лас-Вегас (АҚШ)да ташкил этиладиган UFC Fight Night 217 мусобақаси доирасида америкалик Жефф Нил (15-4)га қарши октагонга кўтарилиши керак эди. Жароҳат сабаб Нил сафдан чиқди, Шавкат эса рақибсиз қолди. Ҳалигача Раҳмоновга янги рақиб топилмаяпти.

Маълумот учун, Брайан Барберена сўнгги бор 2022 йил 3 декабрь куни Рафаэль дос Аньос (32-14)га қарши жанг қилиб, сабмишен билан мағлуб бўлган эди.