UFC чемпиони Жошуа Ван Манель Капенинг чақириғига жавоб берди

Мьянмалик аралаш яккакураш устаси кеча тонгда Брендон Ройвални мағлуб этган португалиялик Манель Капенинг чорловини қабул қилди. У февраль ойидаёқ октагонни бўлишишга чақирган Капега қарши ўз камарини ҳимоя қилишга тайёр.

Чемпионнинг сўзларига кўра, у ушбу жангни 21 февраль куни Хьюстонда - айнан Жошуа Ван яшайдиган шаҳарда бўлиб ўтадиган UFC Fight Night 267 турнирида ўтказмоқчи.

"Хьюстон, Техас, Манель Капе. Келинг, буни амалга оширамиз! Сўз исботи билан", - деб ёзди ижтимоий тармоқда Жошуа бўлажак рақиб ва ташкилотга мурожаат қилиб.

Айни пайтда UFC Fight Night 267 турнирининг асосий воқеаси ўрта вазн тоифасида Шон Стрикленд ва Энтони Эрнандес ўртасидаги жанг деб эълон қилинган. Аммо дунёнинг энг кучли лигаси рақамсиз турнирларда чемпионлик жангларини ўтказиш тажрибасига эга. Шунинг учун ҳам назарий жиҳатдан бу сценарийда имконсиз нарсанинг ўзи йўқ.

Жошуа Ван бир ҳафта олдин энг енгил дивизионнинг янги чемпионига айланганди. Унинг Александр Пантожага қарши жанги 26-сониядаёқ якунланган эди. Бунга бразилияликнинг ноқулай тарзда йиқилиши натижасида тирсагини шикастлаб олгани сабаб бўлганди.