UFC Fight Night 240 турнири марказий жангидан маҳрум бўлди

Ўрта вазн тоифаси етакчиларидан Марвин Веттори ва Брендан Аллен ушбу UFC турнирининг асосий жангида ўзаро октагонга кўтарилишлари керак эди. Вазиятга яқин манбаларнинг хабар беришича, жангнинг бекор қилинишига италиялик Ветторининг машғулотда жароҳат олгани сабаб бўлган. 

Катта эҳтимол билан америкалик рақибсиз қолади ва унинг жанги бекор қилинади. 

"Мен барчасига тайёр эдим. Мен Топ-5 ўриндаман. Шундай экан, рейтингда мендан юқорида турганлар яқин орада жанг қилишга тайёр туринглар. Жаред Каннонир, Роберт Уиттакер ва Исраэль Адесанья, ким мен билан жанг қилади?", - дея ўзининг ижтимоий тармоқдаги саҳифасида хабар қолдирган Аллен. 

Эслатиб ўтамиз, UFC Fight Night 240 турнири 6 апрель куни АҚШнинг Невада штати Лас-Вегас шаҳрида бўлиб ўтади. Агар  Бренданга рақиб топилмаса, у ҳолда аёллар ўртасидаги Норма Дюмонт - Жермейн де Рандами жанги оқшомнинг марказий баҳсига айланади.