UFC Fight Night 270 турнирининг бонус эгалари маълум

Дастлабки кардни ёпиб берган енгил вазн тоифаси вакиллари Мэйсон Жонс ва Аксель Сола иштирокидаги жанг "Кеча жанги" деб топилди ва ҳар икки аралаш яккакураш устаси қўшимча 100 минг доллардан бонус олишди.

Жанг бошидаёқ Сола рақибини бэкфист усулида нокдаун ҳолатига туширди, бироқ Жонс нафақат жангга қайтди, балки ташаббусни ўз қўлига олди ва якунда ҳакамларнинг якдил қарори билан ғалаба қозонди.

Шунингдек, 28 сонияда Остин Лэйнни техник нокаутга учратган ярим оғир вазн тоифаси вакили Иво Бараневский ҳамда иккинчи раундда Равенна Оливейрани нокаутга учратган биринчи энг енгил дивизион спортчиси Шанель Дайер "Оқшом намойиши" учун 100 минг доллардан мукофот пули олишди.

Бундан ташқари, муддатидан аввалги ғалабалар учун қўшимча 25 минг долларлик бонуслар Дэнни Сильва ва Брандо Перичичга насиб этди.