UFC юлдузи рақибига ҳужум қилгани учун 15 йилгача қамалиши мумкин. Масвидаль Ковингтоннинг тишини синдирди, Хабиб эса жиноятни қўллаб-қувватлади

Бир неча кундирки, UFC`даги жанжал сусайгани йўқ: яримўрта вазннинг юлдузли жангчиси Хорхе Масвидаль сўнгги жангидаги рақиби Колби Ковингтонни рестораннинг кириш қисмида дўстлари билан бирга калтаклади. Масвидалнинг икки зарбаси собиқ жамоадошининг тиши синиши учун етарли бўлди. Бунинг натижасида Хорхе 15 йилгача қамалиши мумкин.

Масвидаль аллақачон қўлга олинган, лекин айбни инкор этмоқда — Хорхе жангдан аввалги трешток учун Ковингтонга сабоқ берганига ишонади. Март ойи бошида UFC 272 турнири матбуот анжуманида Колби нафақат Хорхени камситди, балки жангда ҳам рақибига имкон қолдирмаган ҳолда ғалаба қозонди. Эндиликда Масвидалнинг ҳаёти ҳам собиқ дўстининг қўлида — агар Колби унга қарши гувоҳлик берса, у ҳақиқатда ҳибсга олинади.

Зиддият қандай юзага келди?

Зиддият хронологиясини эсга оладиган бўлсак, Ковингтон ва Масвидаль жанг олиб борган UFC 272 турнирига, март ойи бошига қайтишимиз керак бўлади. Бу қарама-қаршилик собиқ дўстлар жанги деб аталди, сабаби Колби ва Хорхе UFC`ни биргаликда забт этишган. Улар битта залда машғулот олиб боршган, бир уйда кун кечиришган ва бир-бирини ака-ука деб чақирган.

Аммо, дўстлик тугади. Хорхе бунда Колбини айблайди — сабаби Ковингтон 2018 йилда Рафаэль Дос Аньосни мағлубиятга учратганидан сўнг, Масвидаль билан гонорарни бўлишмайди. Колби эса Масвидаль шунчаки унинг UFC оқшомидаги муваффақиятига ҳасад қилганини айтган (жанг арафасида Ковингтоннинг фаолияти Хорхега қараганда янада муваффақиятлироқ эди).

Жангчилар бир неча йилдан буён адоватда эди, ҳаммаси шу йилнинг март ойида октагонда ҳал бўлди. Жангда Ковингтон яққол фаворит бўлди — у Масвидалга қараганда анча универсал жангчи, қўшимчасига у яхши кураш тушади. Бу жангда ҳам ўз тасдиғини топди: Ковингтон Масвидалдан фақатгина партерда эмас, балки стойкада ҳам устун келди. Масвидалнинг ҳисобида фақат тўртинчи раунддаги биргина эпизод бор эди, ўшанда у Колбини нокдаунга учрата олмаган эди.

Жангнинг қолган пайтида Ковингтон Масвидалга имконият қолдирмади, собиқ дўстини ҳақорат қилган тарзда мағлуб этди. Жангдан олдин собиқ дўстлар жиддий тарзда трештокка киришишганди, Колби Хорхени ёмон ота эканлигини, фарзандларига ёрдам бермаслигини айтганди:

"Муносабатимиздан ҳеч қандай ижобий натижага эриша олмайман. Хорхе — аҳмоқ. У ўз аёлини солиқлар билан алдайди, фарзандлари билан мулоқот қилмайди, одамлардан фойдаланади".

Ковингтоннинг сўзлари ҳақиқатми ёки йўқ — бу риторик савол. Сабаби, Колби трештокни "безашни" ёқтиради. Бироқ, жангчи Масвидалнинг рафиқаси билан таниш, эҳтимол, вазиятни ичкаридан билади. Хорхе бу сўзлардан хафа бўлди, мағлубиятни қабул қилмаган жангчи реванш олиш илинжида.

Масвидаль тушуниб турибди: уни ёқтирмайди, сабаби Ковингтон матбуот анжуманида унинг болаларини тилга олди. Лекин бу ғалати, чунки Колби Масвидалнинг қариндошларини Усманники сингари тролл қилмади, у нигериялик жангчининг отасини жиноятчи, фирибгар дея ҳақорат қилган (Камарунинг отаси чиндан ҳам фирибгарлик учун америка қамоқхонасида "ўтириб чиққан"). Масвидални мағлуб этганидан сўнг Ковингтон енгил вазндаги Дастин Порьега жиддий гап ташлади:

"Дастиннинг қизи қандайдир сабабга кўра ирландча талаффузга эга. Порье оталик тестини топширмайди деб умид қиламан. Ҳа, ҳа, Конор унинг отаси".

Колби Масвидалга ҳам ҳатто бунчалик қўпол гапирмаган эди — у шунчаки томошабинлар учун ўйнади, Хорхени ғазаблантирди. Ковингтон кўпинча жанг қилиш учун ҳалокат ёқасидаги трештокдан фойдаланади. Америкалик жангчи томошабинларга шоу кўрсатди, ва бу унга фаолиятини сақлаб қолишга ёрдам берди (бир сафар UFC уни зерикарли усул учун кетказмоқчи бўлган). Шундай экан, Ковингтоннинг оғриқли трештоки — зарурий чора. Гарчи, баъзида Колби ошириб юбораётга ўхшайди, ҳамкасблари у учун сценарийлар ёзилаётганига ишонишади.

Масвидални нима учун ҳибсга олишмоқчи?

24 март куни Ковингтонннинг бир дўсти ижтимоий тармоқларга Колби билан тушган суратини жойлайди, Хорхе эса буни кўриб қолади ва собиқ дўсти билан октагон ташқарисида ҳисоблашиш мақсадида ўша ерга боради. Тергов маълумотларига кўра, Хорхе ниқоб, бош кийим кийган ҳолда рестораннинг кириш қисмида Ковингтонга ҳужум қилган. Икки зарба билан Масвидаль Ковингтоннинг тишини уриб синдирган, кўзига ҳам зарба берган ва бундан ташқари, тўқсон минг долларлик Rolex соатига шикаст етказган. Колби соатга ўн беш минг доллар миқдорда зарар етгани ҳақида полицияга хабар берган.

Жиноятдан сўнг 48 соат давомида Масвидаль қўлга олинди ва унга айбловлар эълон қилинди. Эндиликда жангчи қилмиши учун 15 йилгача қамалиши ёки ўн минг доллар миқдорда жаримага тортилиши мумкин. Масвидалнинг ҳужумни режалаштиргани вазиятни оғирлаштириши мумкин.

Ҳозир кўп нарса Ковингтонга боғлиқ — у Масвидалга қарши гувоҳлик бериши мумкин. Гарчи Колби жиноят содир этилган жойдаёқ полицияга шикоят қилган бўлса-да, унинг кейинги қадами муҳимроқ. Масвидалнинг 15 йилга "кесилиши" даргумон, бироқ у чиндан ҳам қамоққа олиниши мумкин.

Жангчиларнинг бу воқеага реакцияси баҳсли бўлди: кимдирлар Масвидаль ҳаракакатини қоралаган бўлса, яна кимдир эса уни қўллаб-қувватлади. Масвидални қўллаб-қувватлаган инсонлардан бири Хабибдир. Нурмагомедов Колби Хорхега қарши гувоҳлик берса, яримўрта вазн жангчиларини унга қарши бойкот эълон қилишга чақирди.

"Агар октагонда кимдандир кучли бўлсангиз, бу сиз унинг болаларини ҳақорат қилишингиз мумкин дегани эмас. Бировнинг оиласини ҳақорат қилишга ҳеч кимнинг ҳаққи йўқ. Агар бу йўлдан юришга қарор қилсангиз, гапирган гапингизга жавоб беришга тайёр туришингиз керак бўлади. Сизга ўзингиз билан тенг профессионал жангчи ҳужум қилди ва сиз унга қарши айбловлар қўйиш учун полицияга борасиз, шундайми? 

Яримўрта вазндагиларнинг бари Колби билан жангни рад этишлари керак деб ўйлайман. Шунчаки, у билан жангга рози бўлманг! У жангсиз қолсин. Бу эҳтимол унга ва оилани ҳақорат қиладиган барча жангчиларга сезиларли таъсир қилар. У билан шуғулланиш учун уни ресторандан излаш керак", - деб ёзган Хабиб.

Шунингдек, Масвидалнинг ўзи ҳам ижтимоий тармоқларда хабар қолдирди: "Ҳаммага хайрли тонг, бировларнинг фарзандлари ҳақида гапиришни ўйлайдиганлар бундан мустасно".

Бироқ Масвидаль айёрлик қиляпти — Ковингтон унинг фарзандларини ҳақорат қилмади, аксинча Хорхенинг ўзини қоралади — яъни уни ёмон ота эканлигини айтди. Агар Колбига Порье ёки Усман ҳужум қилганида мантиққа яқинроқ бўларди, сабаби жангчи уларнинг қариндошлари ҳақида қаттиқроқ гапирганди. Масвидаль, эҳтимол, мағрурлиги туфайли шу ишни қилгандир — Колби уни нафақат жангдан аввал, балки жангда ҳам енгган эди. Бундай ишдан сўнг, одатда спортчилар яна машғулот қилишади ва реванш олишади. Хорхе эса кўчада ҳужум уюштириб, жиноят содир этди.

Жиноятга жангчилар қандай муносабат билдиришди?

Масвидаль айёрлик қилганини унинг собиқ рақиби Бен Аскрен ҳам таъкидламоқда. Хорхе уни 5 секунд ичида нокаут қилганди.

"Тасаввур қилинг, сизда кимдирнинг юзига уришни хоҳласангиз 25 дақиқа вақтингиз бор. Лекин ҳеч нарса ёрдам бермаса, сиз уни ресторан ташқарисида яширинча урасиз. Хорхе менинг оилам ҳақида ҳам гапирган, шундай экан у иккиюзламачи аҳмоқ", - деб ёзган Аскрен ижтимоий тармоқларда (жангдан аввал Масвидаль Беннинг насл-насабини бузишга ваъда берган эди, гарчи унинг уч нафар фарзанди бўлса-да).

Энди Ковингтон Масвидалнинг ҳибсга олиниши учун полицияга гувоҳлик берадими, деган савол туғилади. Баъзилар бу Колби учун шармандалик бўлишини айтмоқда, сабаби жангчи муаммони ўзи ҳал қилиши керак. Бундай одамлар ёзилмаган қоидаларга кўра эркак киши полицияга муражаат қилмаслиги керак деб ҳисоблайди. Лекин бу кодекс, эҳтимол, инсонга ҳужум қилиш мумкин деганидир?!

Ковингтон дўстлари билан ресторанда дам олаётганида, ҳужумни кутмаган. Дастлабки маълумотларга кўра, Хорхе унга бирданига зарба йўллаган, Колбида жавоб қайтаришга имкон бўлмаган. Ҳеч қандай суҳбат бўлмаган — Масвидаль юзига ниқоб кийган ҳолда ҳужум қилган, сўнг воқеа жойидан қочиб кетган. UFC собиқ чемпиони Генри Сехудо Ковингтоннинг Масвидалга қарши гувоҳлик беришини тўғри деб ҳисоблайди.

"Колбининг ўрнида бўлганимда... Сенга нисбатан айёрлик қилишса, полицияга айтмаслик қийин. Агар кимдир менга айёрлик қилганида, мен полицияга шикоят қилардим. Мен чиндан ҳам шикоят қилган бўлардим. Сенинг кимлигинг менга қизиқ эмас. Чунки айёрлик қилиш — яхши иш эмас", - деб айтиб ўтган Сехудо.

Ковингтонни яна бир қанча жангчилар қўллаб-қувватлаяпти. Камару Усман Масвидалнинг иши нотўғрилигини, енгил вазнли Жаред Гордон эса бу ҳолатдан ғазабланганини айтди.

"У ниқобли ва бош кийимли ҳолатда Колбини айёрлик билан урдими? Колби Хорхени қасддан айблайди ва уни судга беради. У ҳақиқатдан ҳам охирги бўлиб кулди. Колби уни айбламаган тақдирда ҳам штат Хорхенинг ишини кўриб чиқади", - дея таъкидлаган жангчи.

Ковингтон ҳозирча сукут сақлаётган бўлса-да, у тергов бўйича ҳамкорликда иш юритиши мумкин. Сабаби жангчи полицияга ўзи қўнғироқ қилиб, жиноят ҳолатлари ҳақида хабар берган. Ковингтон бир неча бор полиция ишини қўллаб-қувватлаган, шундай экан Масвидални жиддий муаммолар кутиб турган бўлиши мумкин.

sports.ru сайти асосида Диёр Мавлонов тайёрлади