Улан-Баторда миллий спортимиз кураш бўйича жаҳон чемпионати ўтказилади

Миллий спорт туримиз кураш бўйича ўтказилиб келинаётган жаҳон чемпионатлари дунёдаги минг-минглаб кураш ихлосмандларининг диққатини тортиши билан бирга, азалий қадриятларимизнинг халқаро майдондаги ёрқин тантанаси бўлиб бўй кўрсатаверади.

Яна бир ҳафтадан кейин Мўғулистон пойтахти Улан-Батор шаҳрида бошланадиган ўсмирлар ўртасидаги IX жаҳон чемпионати ҳамда фахрийлар ўртасидаги III-жаҳон чемпионати ҳам курашнинг дунё спорт майдонидаги оммавийлигини таъминлашга хизмат қилиши билан қадрли.   

Халқаро кураш ассоциацияси куни кеча мазкур жаҳон чемпионатида иштирок этадиган миллий терма жамоаларни рўйхатга олиш муддати якунланганини эълон қилди.  

Халқаро кураш ассоциациясига йўлланган талабномаларга кўра, Мўғулистон пойтахтида ўтадиган жаҳон чемпионатида 30 дан зиёд давлатнинг 400 нафардан ортиқ спортчилари беллашувларда иштирок этади.   

Мазкур жаҳон чемпионати доирасида Улан-Баторда курашни янада ривожлантириш мақсадида мураббий ва ҳакамлар учун семинарлар, Халқаро кураш ассоциациясининг бир қатор кенгайтирилган йиғилишлари, турли брифинг ва кўргазмалар ташкил этилиши белгиланган.   

Жаҳон чемпионати низомига мувофиқ, жорий йил 2 декабрдан беллашувларга старт берилади. Айни кунларда Мўғулистонда ўтадиган кураш мусобақаларини юқори савияда ташкил этиш борасида Улан-Баторда Халқаро кураш ассоциациясининг ишчи гуруҳи ўз фаолиятини олиб бормоқда.   

Эслатиб ўтамиз, ушбу жаҳон чемпионатида ватанимиз шарафини ҳимоя қилишга ҳозирланаётган кураш бўйича Ўзбекистон миллий терма жамоаси аъзолари, мураббийлар Тошкент вилоятида ўтказилаётган ўқув-машғулот йиғинларида иштирок этмоқда.