Универсиада. Ғолиблар республика финал босқичида иштирок этади + ФОТО

ЎзДЖТСУнинг гимнастика залида юқори савияда ташкил этилган "Street Workouyt" (кўча спорти) баҳсларида ўғил болалар ва қизлардан иборат мезбон жамоалар рақибларидан очколар ҳисобига устун келиб, биринчи ўринни қўлга киритишди. Иккинчи ўринни ўғил болалар ва қизлар ўртасида Чирчиқ давлат педагогика институти жамоаси эгаллади.

ЎзДЖТСУнинг манежида ташкил этилган бадминтон бўйича ўтказилган беллашувларда ҳам мезбонларнинг қўли баланд келиб, биринчи ўринни банд этишди. Мусобақалар якунига етгач, ғолиб ва совриндорлар муносиб тақдирланишди.

Универсиада спорт ўйинларининг белгиланган низомига мувофиқ, ушбу мусобақаларда ғолиб бўлган жамоалар энди республика финал босқичларида иштирок этишади.

- Яқинда Чирчиқда ўтказилган Универсиада спорт ўйинлари дастуридан ўрин олган белбоғли кураш бўйича республика финал босқичида ҳам талабаларимиз умумжамоа ҳисобида биринчи ўринни қўлга киритиб, университетимиз шарафини муносиб ҳимоя қилишган эди дейди, - ЎзДЖТСУ "СКУФ" спорт клуби раиси ўринбосари Тўрақул Раҳмонов. - Бугунги вилоят саралаш баҳсларида талабаларимиз финалга йўлланмани нақд қилишди. Ниятимиз, Тошкент вилояти терма жамоаси республика финал ўйинларида ҳам биринчи бўлиш.

Илҳом РАҲМОНОВ тайёрлади