18 ноя 14:50
Янгиликлар
UFC'да Асу Алмабаевнинг чемпионлик учун курашиш имконияти ҳақида гапирилди
Ушбу тўқнашув яқинлашиб келаётган дам олиш кунлари Қатардаги турнир доирасида бўлиб ўтади.
UFC.com таъкидлашича, ушбу жангдаги ғалаба энг енгил вазн тоифасида чемпионлик жангига асосий даъвогарлардан бирига айланиш имконини беради.
"Енгил вазн дивизионидаги рейтингнинг юқори поғоналари учун кураш давом этади. Топ-10 вакиллари Кёдзи Хоригучи ва Асу Алмабаев ўтказиб юбориш мумкин бўлмаган жангда октагонга чиқади.
Хоригучи UFC рейтингига қайтиш йўлидаги ҳаракатини ўтган йил ноябрь ойида Қатарда бошлаган ва Тагир Уланбековни учинчи раундда сабмишен орқали мағлуб этган. Кейин Амир Албазидан устун келган, бироқ июнь ойида Манел Капега муддатидан олдин мағлуб бўлган. Энди 36 ёшли “Каратэ бола” дивизион рейтинги кучли бешлигидан жой олиш учун қозоғистонлик истиқболли рақиб билан куч синашади.
Бу дам олиш кунлари Алмабаев ҳам ўтган йилги турнирда Алекс Пересни учинчи раундда сабмишен орқали мағлуб этганидан кейин иккинчи марта ABHA Arena майдонида жанг қилади. Ўшандан буён у июнь ойида Чарльз Жонсонни “Сулоев чўзилиши” усулидаги оғриқли ушлаш орқали мағлуб этиб, ғалабали сериясини учта жангга етказди. Шунингдек, UFC октагонидаги натижасини 7–1 кўринишига келтирди. Хоригучи устидан қозониладиган ғалаба унга илк бор чемпионлик учун даъвогарлар қаторига қўшилиш имконини беради.
Январь ойида UFC 336 турнирида чемпионлик камари учун жанг ўтказилишидан олдин ҳам дивизионда бир қатор муҳим тўқнашувлар бўлиб ўтади. Улар орасида мазкур жанг ҳам бор. Келаси йили Торонто шаҳрида йилнинг биринчи рақамли турнирига қадар дивизиондаги кучлар нисбати қандай ўзгаришини кўриш жуда қизиқ бўлади. Ушбу жангчиларнинг ҳар бири амалдаги чемпион Жошуа Ваннинг янги рақибига айланиши мумкин. Қолаверса, уларнинг иккаласи ҳам аввал чемпионлик учун даъвогар Манел Капе билан тўқнаш келган. Шу боис бу жанг кейинги титул даъвогарини аниқлаб бериши ҳам мумкин", — дейилади мақолада.
Асу Алмабаев — Кёдзи Хоригучи жанги 21 ноябрь куни Доҳа шаҳрида бўлиб ўтади. Турнирнинг асосий карди Тошкент вақти билан соат 23:00 да бошланади.
Фикрлар