Усман Нурмагомедов потенциал рақибларига мурожаат қилди

Америкалик Эй Жей МакКи ҳамда ирландиялик Пол Хьюз ўртасидаги жанг ғолиби Усман Нурмагомедовнинг чемпионлик камари учун даъвогарга айланади.

"Йигитлар, иккалангизга ҳам омад ёр бўлсин! Мен энг зўри билан жанг қилишни истайман. Рақиб Эй Жейми бўладими ёки Хьюз, очиғи менга бунинг фарқи йўқ", - дея ўзининг ижтимоий тармоқдаги саҳифасида хабар қолдирган россиялик чемпион. 

Эслатиб ўтамиз, Эй Жей МакКи ва Пол Хьюз ўртасидаги жанг бугун Саудия Арабистони пойтахти Ар-Риёд шаҳрида ташкил этиладиган "PFL гигантлари тўқнашуви" турнири доирасида бўлиб ўтади. 

Эй Жей МакКи 4 та ғалабали серия билан келмоқда. У ўзининг сўнгги жангида Клей Коллардни биринчи раунднинг ўзида мағлуб этганди. Пол Хьюз эса шу йилнинг июнь ойида Bellator лигасида муваффақиятли дебют қилган эди. Пол иккинчи раундда Бобби Кингни техник нокаут эвазига мағлубиятга учратганди. Ирландиялик бу жангига қадар Cage Warriors лигасида кетма-кет 5 та жангда зафар қучган.

Усман Нурмагомедов эса сентябрь ойида ватандоши Александр Шаблийни очколар ҳисобига кўра мағлуб этиб, чемпионлик камарини муваффақиятли тарзда ҳимоя қилганди.