"Uzbek Tigers" vs "Venesuela Caciques". Матбуот анжумани бўлиб ўтди

Маълумот учун, бу икки жамоа жойлашган А гуруҳида Кубанинг Cuba Domadores жамоаси 9 очко билан пешқадамлик қиляпти. Озодлик ороли вакиллари ўтказилган 4та жангдан 3тасида ғалабага эришишган. Ягона мағлубиятни айнан ўзбек боксчиларидан қабул қилиб олган.

“Uzbek Tigers” ҳамда Колумбиянинг Colombia Heroicos жамоалари ҳисобида 5-тур олдидан 7тадан очко бор. Эртанги рақибларимиз 5 очко билан гуруҳда сўнгги ўринни эгаллаб турибди. Чорак финалга чиқиш учун эртанги иккита учрашувда ғалаба қозониш талаб этилади.  

Бугун венесуэлаликларга қарши жанг олдидан матбуот анжумани ташкил қилинди. Маросимни Ўзбекистон бокс федерацияси бош котиби Мурод Мамадалиев кириш сўзи билан очиб берди:

М. Мамадалиев: Термиз шаҳрида ўтказилаётганидан хурсандмиз. Бу ташаббус Сурхондарё вилоятида боксни ривожлантириш учун хизмат қилади. Фурсатдан фойдаланиб, барча ташкилотчиларга бокс оқшомини ташкил этишга берган ёрдамлари учун миннатдорчилик билдираман.

Марина Ни: Биринчи галда Ўзбекистон ҳукуматига Бутунжаҳон бокс серияси доирасидаги жанглар ўтказилишини қўллаб-қувватлагани учун раҳмат айтмоқчиман. Ташкилотчилик жуда юқори даражада. Буни алоҳида эътироф этишим керак. Ўзбекистонда бокс биринчи рақамли спорт тури эканлигига яна бир бор амин бўлдим. Юртингизда ҳамма даврда ҳам кучли мураббий ва боксчилар бўлган. Айниқса, бугунги кунда ўзбек бокси дунёда биринчи ўринда турибди.  

Франс Лопес (AIBA вакили): Ҳар иккала жамоага омад тилайман. Кучли томон ғалаба қозонсин.

Матбуот анжуманининг биринчи қисмида меҳмон жамоа аъзолари иштирок этишди. Боксчилар бош мураббий Алфредо Лемус бошчилигида анжуманлар залида ҳозир бўлишди.

А.Лемус: Боксчиларингиз омад ёр бўлсин. Биз ҳам чиройли бокс намойиш этишга ҳаракат қиламиз.

Анжуманнинг иккинчи қисмида чарм қўлқоп усталаримиз ҳамда жамоа бош мураббийи Тўлқин Қиличев ОАВ вакилларини қизиқтирган саволларга жавоб қайтаришди.          

Т. Қиличев: Ассалому алайкум, ҳурматли сурхондарёликлар! Шу жангларнинг Термиз шаҳрида ўтказилаётганидан хурсандман. Бекзод Тўрабоевга раҳмат. Боксчиларимиз сизларни уялтириб қўймаслик учун астойдил ҳаракат қилишади.